Aqtaýlyqtar áli teńizge shomylyp júr
AQTAÝ. KAZINFORM – Kúntizbe boıynsha kúz kelgenimen, Aqtaýda teńiz jaǵasyndaǵy demalys maýsymy áli aıaqtalǵan joq. Turǵyndar men qala qonaqtary Kaspıı jaǵalaýyna baryp, kúnge qyzdyrynyp, sýǵa túsip júr.
Mamandardyń málimetinshe, bıyl teńiz jaǵalaýyndaǵy demalys maýsymy qyrkúıek aıynda da jalǵasyp otyr. Jaǵajaılarda shezlong pen shatyr jalǵa alyp, teńizde júzetinder bar.
Turǵyndardyń biri teńizge kúzde de keletinin aıtady.
- Aqtaýda teńizge tek jazda emes, qyrkúıekte de kelýge bolady. Kún jyly bolsa, sýǵa túsip, demalyp qaıtamyz. Teńizdiń aýasy da jaqsy, - deıdi Nurlan esimdi turǵyn.
Qalaǵa qonaq bolyp kelgenderdiń arasynda da Kaspıı jaǵalaýynda ýaqyt ótkizetinder bar.
- Aqtaýǵa arnaıy kelip, teńiz jaǵasyn kórýdi josparlaǵan edik. Kúz kelse de kún jyly eken. Sondyqtan teńizge túsip, jaǵalaýda demalyp jatyrmyz, - deıdi Atyraý oblysynyń turǵyny Aıgúl Muratova.
Al jergilikti turǵyndardyń biri úshin teńizge barý - maýsymǵa qaramaıtyn ádetke aınalǵan.
- Biz úshin teńizge barý - kúndelikti demalystyń bir túri. Aýa raıy qolaıly bolsa, kúzde de, kóktemde de sýǵa shomyla beremiz. Óıtkeni, teńiz sýy tuzdy, densaýlyqqa paıdaly, - deıdi aqtaýlyq turǵyn Nazgúl Bekish.
Aıta keteıik, qutqarýshylar turǵyndar men qala qonaqtaryn tek arnaıy jabdyqtalǵan jaǵajaılarda shomylýǵa shaqyrady. Sebebi, Mańǵystaý oblysynda sýǵa túsýge tyıym salynǵan birqatar jaǵalaý bar.
Buǵan deıin, Balqash bıylǵy shomylý maýsymynda 200 myńǵa jýyq týrıst qabyldaǵanyn jazǵan bolatynbyz.
