Aqtaýlyqtar ózderi tańdaıtyn avtonómirler úshin uzyn-sonar kezekke turdy

AQTAÝ. KAZINFORM – Qazaqstandyqtarǵa kóliginiń memlekettik nómirine áriptik jáne tsıfrlyq belgilerdi tańdaý múmkindigi berildi. Osyǵan oraı, búgin 5-qańtardan bastap, turǵyndar tańsáriden halyqqa qyzmet kórsetý ortalyqtaryna jappaı aǵylǵan. 

Aqtaý qalasyndaǵy Halyqqa qyzmet kórsetý ortalyǵynda adamnyń kóp bolǵany sonsha, kezek tipti kóshege deıin jalǵasqan. 

«Azamattarǵa arnalǵan úkimet» memlekettik korporatsııasy rasynda da tańerteń adam biraz jınalǵanyn, biraq qazir bári qalypty jaǵdaıda ekenin jetkizdi. 

Dál osyndaı jaǵdaı Aqtóbe, Qyzylorda jáne basqa qalalarda da baıqalǵan. Halyq ózderine unaıtyn nómirler úshin jappaı kelip jatyr.

Buǵan deıin, QR Іshki ister mınıstrligi 5 qańtardan bastap qazaqstandyqtar kólik nómirin ózderi erkin tańdaı alatynyn habarlaǵan bolatyn.

Mınıstrliktiń málimetinshe, endi júrgizýshiler arnaıy mamandandyrylǵan halyqqa qyzmet kórsetý ortalyqtary arqyly qajetti áriptik jáne tsıfrlyq belgileri bar memlekettik nómirdi tańdaý múmkindigine ıe bolady.

- Kez kelgen qajetti áriptik jáne tsıfrlyq belgileri bar memlekettik tirkeý nómirlik belgisiniń quny 10 aılyq eseptik kórsetkishten (AEK) 15 AEK-ke deıin bolady, – dep habarlady ІІM.

Alaıda bul múmkindik joǵary suranysqa ıe, erekshe sanattaǵy memlekettik tirkeý nómirlik belgilerine qoldanylmaıdy. Mundaı nómirler burynǵy tártippen, bólek talaptar men tarıfter arqyly beriledi.

Jańa ereje kólik ıelerine yńǵaıly jaǵdaı jasap, qyzmet kórsetý protsesin jeńildetýge baǵyttalǵan.