Aqtaýlyq jas naýbaıshy shubat pen balqaımaqtan erekshe bálish daıyndaıdy
AQTAÝ. KAZINFORM – Aqtaýda adam aǵzasyna paıdaly, tabıǵı ónimderden daıyndalatyn nan túrlerin pisiretin jas naýbaıshy Jarbolsyn Júsip búginde qala turǵyndaryna erekshe dám usynady.
Jas maman shubat pen balqaımaq qosylǵan tátti bálish ázirlep, jergilikti ónimderdi dáripteýge úles qosyp keledi.
Jarbolsyn Júsiptiń aıtýynsha, ol bul salaǵa bala kúninen qyzyqqan. Aǵasynyń kofehanasynda kómektesip júrip, taǵam daıyndaýǵa degen qyzyǵýshylyǵy artyp, keıin osy baǵytta bilim alǵan. Aldymen Mańǵystaý týrızm kolledjinde taǵam tehnology mamandyǵyn meńgerip, keıin Astana qalasynda naýbaıshy mamandyǵy boıynsha oqýyn jalǵastyrǵan. Jıyrma jastaǵy naýbaıshynyń taǵam salasynda júrgenine alty jyl, al nan ónimderin daıyndaýmen aınalysyp kele jatqanyna eki jarym jyl bolǵan.
Qazirgi tańda ol Aqtaýdaǵy kofehanalardyń birinde bas naýbaıshy qyzmetin atqarady. Jas maman kún saıyn tańsáriden bastap túnge deıin as bólmesinde jumys istep, kelýshilerge ystyq nan men tátti toqashtar usynady. Onyń jetekshiligimen bes naýbaıshy kúndizgi jáne túngi aýysymda eńbek etedi.
Jarbolsyn tek tabıǵı ónimderdi paıdalanady. Ol pisiretin nan ónimderine qurǵaq, hımııalyq ashytqy qospaıdy. Nandar arnaıy tabıǵı ashytqymen ılenedi. Alma sýynan jasalǵan ashytqyny Astanadan ákelgen. Aıtýynsha, atalǵan ashytqy Frantsııadan jetkizilip, toǵyz jyl boıy saqtalyp kele jatqan erekshe ónim.
- Nandar keminde eki kún daıyndalady. Sonyń arqasynda uzaq ýaqyt boıy jumsaqtyǵyn, ylǵaldylyǵyn saqtaıdy. Quramyna irimshik, qaraqumyq sekildi dárýmenge baı dánder qosamyz. Mundaı nan ónimderi qant dıabetimen aýyratyn, dıeta ustaıtyn jáne salaýatty ómir saltyn ustanatyn adamdarǵa paıdaly. Erekshe balalardyń ata-analary da bizdiń ónimderdi jıi satyp alady, - deıdi ol.
Jas naýbaıshy daıyndaıtyn ónimderdiń biri - Mańǵystaýdaǵy ulttyq taǵamdar shubat pen balqaımaq qosylǵan tátti bálish. Onyń sózinshe, bul ónimdi ázirleýge birneshe salanyń mamandary qatysqan.
- Buryn óńirimizdiń ereksheligin tanytatyn, qonaqtarǵa usynýǵa bolatyn arnaıy tátti joqtyń qasy edi. Sondyqtan quramyna mindetti túrde shubat pen balqaımaq qosylatyn ónim daıyndaýdy jón kórdik. Bul – komandalyq jumys. Etnograf, dızaıner, taǵam tehnologtary birigip eńbek etti. Bálish frantsýzdyń brıýsh qamyrynan jasalady. Qamyr tabıǵı ashytqymen ılenip, 16 saǵat boıy kóteriledi. Keıin oǵan shubat qosylady. Kremin de arnaıy tehnologııa arqyly qoıýlatylǵan taza aýyl shubatynan daıyndaımyz. Peshte piskenniń ózinde shubattyń dámi saqtalyp qalady, - deıdi bas naýbaıshy.
Onyń aıtýynsha, táttiniń taǵy bir negizgi ıngredıenti - tabıǵı balqaımaq. Bul ónim karameldiń ornyn basyp qana qoımaı, bálishke erekshe dám beredi. Sońynda tátti betine ártúrli jańǵaqtar sebiledi.
Qazirgi tańda bul bálish Aqtaý turǵyndarynyń súıikti táttileriniń birine aınalǵan. Suranys joǵary bolǵandyqtan, kúnine 100-150 danaǵa deıin daıyndalady. Tańǵy saǵat segizde ystyq kúıinde sórege qoıylýy úshin naýbaıshylar túngi saǵat 00:00-den bastap jumysqa kirisedi.
Jarbolsyn Júsiptiń aıtýynsha, bul ónim arqyly óńirdiń mádenıeti men ulttyq dámin tanytyp, týrızm salasyna da úles qosý kózdelgen.
- Biz tek tátti daıyndap qana qoımaı, Mańǵystaýdyń brendine aınalatyn ónim shyǵarǵymyz keldi. Sheteldik nemese ózge óńirden kelgen qonaqtar osy tátti arqyly jergilikti dámmen tanyssa deımiz, - deıdi ol.
Jarbolsynnyń bala kúngi armany – Memleket basshysyna arnaıy tátti ázirleý. Aldaǵy ýaqytta ol jergilikti tabıǵı ónimderdi paıdalana otyryp, jańa dám túrlerin shyǵarýdy josparlaıdy.
Buǵan deıin, Aqtaýda áýe shekarasyn qorǵap júrgen jas áskerı ushqysh týraly jazǵan bolatynbyz.
