Aqtaýlyq zeınetker alaıaqtardyń qurbany bolyp, bankti sotqa berdi

AQTAÝ. KAZINFORM — Zeınetkerdiń aıtýynsha, alaıaqtar onyń atyna nesıe rásimdep alǵan. Al bank onyń tólem qabiletin teksermesten, iri kólemde nesıe berip jibergen. Áıel 178 880 teńge zeınetaqy alsa, aı saıynǵy tólem 173 330 teńge. Zeınetker bul nesıeni zańsyz dep tanýdy surap, sotqa shaǵymdanǵan. 

Oqıǵa byltyr sáýirde bastalǵan. Belgisiz adamdar áıelge qońyraý shalyp, ózderin quqyq qorǵaý organdarynyń qyzmetkerleri retinde tanystyrady. Olar zeınetkerdi «nesıelik alaıaqtardan» qarjysyn qorǵaý qajet dep birneshe saǵat boıy úgittep, sendiredi. Sodan soń, nesıe alýǵa tyıym salý úshin, telefonyna qosymsha ornatqan. Sol kezde alaıaqtar áıeldiń atyna onlaın rejımde 4,9 mıllıon teńge jýyq nesıe rásimdegen. Oǵan qosa, depozıttik shotynan 2 mıllıon 758 myń teńgeni sheship alǵan. Zeınetker bank qosymshasynda atyna nesıe rásimdelgenin keıin anyqtaıdy.

Zardap shekken áıeldiń aıtýynsha, bank onyń qarjylyq múmkindigin durys teksermeı, ishki erejeler men Qarjy naryǵyn retteý agenttiginiń talaptaryn buzyp, nesıe bergen. Sondaı-aq ol vıdeoverıfıkatsııadan ótkenin rastady, biraq dál sol sátte nesıe rásimdelip jatqanyn túsinbegen. Óıtkeni, ol alaıaqtardyń psıhologııalyq qysymynda bolǵan.

— № 170 qaýlyǵa sáıkes, bank boryshtyq júkteme koeffıtsıentin eseptep, barlyq tabys kózi men shyǵyndy eskerýi tıis. Meniń jaǵdaıymda tabysym artyq kórsetilgen, shyǵyn eskerilmegen, al nesıeniń ózi naqty baǵalaýsyz maquldanǵan, — deıdi zeınetker.

Ol bankke, Tutynýshylar quqyǵyn qorǵaý agenttigine jáne prokýratýraǵa aryzdanǵan. Alaıda olar sotqa shaǵymdanýǵa keńes bergen. Birinshi ınstantsııadaǵy sot zeınetkerdiń talabyn qanaǵattandyrýdan bas tartyp, nesıe rásimdeý mámilesin jaramdy dep tanyǵan.

— Sonda men ishpeı-jemeı, ómir súrmeı, tek nesıe tólep otyrýym kerek pe? Alaıaqtardyń meni aldaǵany birinshi másele. Al banktiń maǵan bul nesıeniń aýyrtpalyǵyn bile tura bergeni ekinshi másele. Sondyqtan zańnyń oryndalýyn talap etemin, — deıdi zeınetker.

Zardap shekken áıel endi apellıatsııalyq sotqa shaǵym ázirlep jatyr.

Buǵan deıin, Onlaın-alaıaqtyq: turǵyndar páterleri men kólikterinen aıyryl jatqany týraly jazǵan bolatynbyz.

Alaıaqtyqtyń jańa túrine baılanysty ІІM qazaqstandyqtarǵa úndeý jasady.