Aqtaýlyq zerger – kóne naqysh pen qazirgi dızaındy ushtastyrý sheberi
AQTAÝ. KAZINFORM — Aqtaýlyq 28 jastaǵy zerger Damır Tórebaı ulttyq áshekeı buıymdardy zamanaýı úlgide jańǵyrtyp, kópshilik suranysyna ıe buıym jasaýmen aınalysady. Kóne dástúr men qazirgi dızaındy ushtastyryp, erekshe qoltańbasyn qalyptastyryp úlgergen jas shebermen Kazinform tilshisi suhbattasty.
- Damır, zergerlik ónerge qalaı keldińiz?
- Meniń ónerge qyzyǵýshylyǵym bala kezden bastaldy. Aldymen sýret salýmen aınalystym. Keıin Mańǵystaý óner kolledjinde sýretshi, músinshi mamandyǵyn meńgerdim. Odan soń Temirbek Júrgenov atyndaǵy Qazaq ulttyq óner akademııasynda «Zergerlik is» mamandyǵy boıynsha bilim aldym. Sol jerde tájirıbeli ustazdardan tálim alyp, zergerlik ónerdiń qyr-syryn tereń meńgerdim. 2020 jyly Aqtaýǵa kelip, óz sheberhanamdy ashtym.
- Qandaı baǵytta jumys isteısiz?
- Negizinen ulttyq naqyshtaǵy áshekeılerdi jasaımyn. Ásirese Batys Qazaqstan óńirine tán sirkeleý, zerleý tásilderin qoldanamyn. Burynǵy kóne buıymdardyń pishini úlken bolǵan, al men olardy qazirgi zamanǵa yńǵaılap, kúndelikti taǵýǵa laıyqtap, kishireıtip jasaımyn. Biraq kóne elementterin saqtaýǵa tyrysamyn.
- Qandaı buıymdarǵa suranys joǵary?
- Boıtumar, qudaǵı júzik, oımaq júzik sııaqty ulttyq buıymdarǵa suranys kóp. Qazir tek kúmispen jumys istep jatyrmyn. Aldaǵy ýaqytta altynmen de jumys isteýdi josparlap otyrmyn.
- Bir buıymdy jasaý qansha ýaqyt ketedi?
- Bir saqınany jasaýǵa shamamen 4-7 kún ketedi. Al tolyq jıyntyqty (saqına, syrǵa, alqa) 20-30 kúnde daıyndaımyn.
- Kásipti bastaýǵa memleket tarapynan qoldaý boldy ma?
- Iá, oqý bitirgennen keıin «Bastaý bıznes» baǵdarlamasy arqyly grant uttym. Keıin oblystyq deńgeıdegi «Táýelsizdik urpaqtary» baǵdarlamasynan da qaıtarymsyz grant jeńip aldym. Sol qarajattarǵa sheberhanamdy qajetti qural-jabdyqtarmen qamtamasyz ettim. Aldaǵy ýaqytta janyma birneshe jumysshy alýdy josparlap otyrmyn. Olardyń jumys oryndaryn da daıyndap qoıdym.
- Qazirgi tańda tapsyrys qaı óńirlerden keledi?
- Buıymdarǵa suranys óte joǵary. Mańǵystaý óńirinen bólek, Astana, Pavlodar, Semeı qalalarynan da tapsyrys berýshiler bar. Qazir sheberhananyń janynan shaǵyn dúken ashyp, daıyn buıymdardy da satýdy bastadym.
- Sizdi ne shabyttandyrady? Jańa ıdeıalardy qaıdan tabasyz?
- Kóbine mýzeılerge baryp, kóne buıymdardy zertteımin. Sonymen qatar sheteldik dızaınerlerdiń jumystaryn kóp qaraımyn. Sol arqyly ulttyq ónerdi zamanaýı baǵytta damytýǵa tyrysamyn.
- Zerger bolý ońaı ma? Bul kásiptiń qandaı qıyndyqtary bar?
- Zerger bolý úshin eń bastysy – tabandylyq pen shydamdylyq qajet. Sondaı-aq, sýret salý qabileti óte mańyzdy. Sebebi kez kelgen dızaıner, sáýletshi nemese zerger úshin beıneleý óneri qajet. Al, qıyndyǵy – birden kóp tabysqa shyǵý qıyn. Tabys - tájirıbemen, senimmen keledi.
Buǵan deıin, Mańǵystaýdaǵy Beket ata jerasty meshitteriniń tarıhy týraly jazǵan bolatynbyz.
