Aqtaýlyq turǵyndar zańsyz qorshaýdy buzdyryp, qurylys kompanııasyna shaǵym túsirdi
AQTAÝ. KAZINFORM – 14-shaǵyn aýdannyń turǵyndary úıleriniń janynan jańadan turǵyn úı qurylysyn salyp jatqan kompanııaǵa qatysty quzyrly organdarǵa shaǵymdandy.
Aıtýlarynsha, qurylys mekemesi óziniń aýlasyna qosa, turǵyndar ótetin jerdi de zańsyz qorshap alǵan.
- Biz júretin jerdi jaýyp alǵan. Endi úıdiń artyn japqan. Órt qaýipsizdigi qaıda? Keshe osy qurylystyń bas josparyn alyp qaradyq. Myna jerdiń barlyǵy olarǵa tıesili emes eken, - deıdi turǵyndardyń biri Fatıma Elbaeva.
Sondyqtan turǵyndar qurylys kompanııasynyń ókilinen qorshaýdy buzyp, ornyn qalpyna keltirýdi talap etti.
- Men búgin ákimdikten barlyq málimetti aldym. Osynsha jerdi qorshap alýǵa ruqsattary joq. Biz qorshaýdy alyp, burynǵy joldy qaıta qalpyna keltirip, joldy ashyp, asfalt tóseýdi talap etemiz, - deıdi Marına Óteshova.
Qurylysqa jaýapty kompanııanyń ókili jobasyn kórsetip, qorshaý soǵan sáıkes salynǵanyn aıtyp otyr. Biraq Aqtaý qalalyq máslıhatynyń depýtaty Gúlmıra Ábishevanyń aıtýynsha, jerdi belgilengen aýmaqtan artyǵymen ıemdenip, qorshaǵany anyq kórinip tur.
- Ákimdikpen kelispeı, ózderi myna úıdiń aınalasyn qorshap alǵan. Biraq ol jer memleketke jata ma, joq jekemenshik jeri ma, ózderi naqty aıta almaı otyr. Endi tekseris júrgizilip, artyq jerler qaıtarylady. Biraq biz búgin turǵyndardyń shaǵymy boıynsha, kompanııanyń basshysyna ázirge jaǵdaı anyqtalǵansha bútkil qorshaýdy alyp tastaý týraly tapsyrma berdik. Qazir alyp jatyr. Endi bul másele baqylaýymyzda bolady, - deıdi depýtat.
Nátıjesinde qorshaý buzylyp, turǵyndar úılerine tarasty. Alaıda máseleniń mán-jaıy tekserýden keıin belgili bolmaq.
Buǵan deıin, Mańǵystaýda Ózbekstanmen shekaradaǵy «Tájen» ótkizý beketiniń 3 aıǵa jabylatyny týraly jazǵan bolatynbyz.