Aqtaýlyq turǵyn úıiniń kireberisin qazaqy naqyshta ásemdep, kópke úlgi kórsetti
AQTAÝ. KAZINFORM — Aqtaý qalasynyń turǵyny Ersaıyn Seıitjannyń úıiniń kireberisi murajaı sekildi.
Egde jastaǵy turǵyn qabyrǵalar men baspaldaqtarǵa kıiz úıdiń keregesi men shańyraǵyn salyp, aınalasyn qoshqar múıiz oıýymen bezendirip qoıǵan. Ondaǵy maqsaty — ulttyq qundylyqtardy nasıhattaı otyryp, tazalyq saqtaý.
— Kóp qabatty úılerde aǵymdaǵy jóndeý jumystary jasala bermeıdi. Sondyqtan men qabyrǵalardy jańartyp, syrlaı otyryp podezge tekemet túrinde sýret saldym. Bolashaqta balalarǵa ónege bolsyn deımin. Kireberistiń taza bolǵany ózimizge jaqsy. Jastar osydan úlgi alsa eken, — deıdi ol.
Ersaıyn Seıitjan bos ýaqytynda sýret salǵandy unatady. Ol bes qabatty úıdiń kireberisin bezendirmesten buryn, onyń jobasyn ázirlep alǵan. Sodan soń sýretti eki apta salǵan. Al jubaıy terezege japqysh ilip, kireberisti odan beter ásemdepti.
Ersaıyn Seıitjannyń nemeresi, tórtinshi synyp oqýshysy Sulýym atasyna kómekshi. Ol túrli-tústi syrdy ezip, qabyrǵaǵa trafarettiń kómegimen sýret salýǵa járdemdesken. Oqýshynyń aıtýynsha, qonaqtar qazaqy naqyshta bezendirilgen kireberiste selfı jasaǵandy unatady.
— Bizdiń úıge qonaq kóp keledi. Olar sýretterdi kórip, tań qalady. Kim saldy degende atam ekeýmiz saldyq dep maqtanyp aıtamyn, — deıdi oqýshy.
Buǵan deıin, Aqtaýda 250-ge jýyq úlesker baspanaǵa qol jetkize almaı júrgeni týraly jazǵan bolatynbyz.