Aqtaýlyq sarbazdan áskerı bólimdegi uryp-soǵýǵa qatysty shaǵym tústi: sotqa deıingi tergeý bastaldy
AQTAÝ. KAZINFORM — Aqtaýdan áskerge shaqyrylǵan sarbaz Aqtóbedegi áskerı bólimde serjanttar tarapynan birneshe ret soqqyǵa jyǵylǵanyn málimdedi. Qazir sarbaz aýrýhanada jatyr.
Áskerı qyzmetshiniń anasy Gúldana Ketıbaevanyń aıtýynsha, onyń 18 jastaǵy uly Dosymbet bıyl 3 shildede ásker qataryna shaqyrylyp, Aqtóbedegi Ulttyq ulannyń № 6655 áskerı bóliminde merzimdi áskerı qyzmetin ótep júrgen.
Áıeldiń sózinshe, 4 qyrkúıekte oǵan Aqtóbedegi aýrýhanadan qońyraý shalyp, ulynyń úsh kúnnen beri medıtsınalyq mekemede jatqanyn habarlaǵan.
Aldymen sarbazdy ýrolog teksergen. Alaıda júrgizilgen taldaýlardan ınfektsııa anyqtalmaǵan. Keıin shaqyrylǵan travmatolog onyń qýyqqa qatysty máselesi alǵan jaraqatpen baılanysty bolýy múmkin ekenin aıtqan.
Gúldana Ketıbaevanyń aıtýynsha, dárigermen sóıleskennen keıin uly áskerı bólimde ózin birneshe ret urǵanyn anasyna aıtqan. Travmatolog sarbazben sóılesken soń polıtsııa shaqyrǵan. Áskerı qyzmetshi aryz jazǵan.
Keıin sarbaz polıtsııada bolǵan kezde anasymen beınebaılanys arqyly sóılesip, ózin aǵa serjant pen taǵy eki serjant urǵanyn aıtqan.
Qazir áskerı qyzmetshiniń anasy týystarymen birge Aqtaýdan Aqtóbege shuǵyl bara jatyr.
— Aqtóbedegi bul áskerı bólimde ne bolyp jatqanyn anyqtap, tekserý júrgizip, jaǵdaıdy jarııa etýdi suraımyz, — deıdi sarbazdyń anasy.
Qazaqstan Respýblıkasy Ulttyq ulanynyń «Batys» óńirlik qolbasshylyǵynyń málimetinshe, 6655 áskerı bóliminiń merzimdi áskerı qyzmetshisine qatysty atalǵan fakti boıynsha Batys óńirlik áskerı-tergeý basqarmasynyń Aqtóbe bólimi sotqa deıingi tergeý júrgizip jatyr.
— Qazirgi ýaqytta istiń barlyq mán-jaıy anyqtalyp jatyr. Jan-jaqty ári obektıvti tekserý nátıjeleri boıynsha tıisti quqyqtyq baǵa beriledi, — delingen habarlamada.
Buǵan deıin, 5 balanyń ákesiniń ólimi: Aqtaýda bir adam 8 jylǵa sottalyp, ekeýi sot zalynan bosatyldy.
