Aqtaýlyq oqýshy «Mektepke aparar qaýipsiz jol» jobasyn ázirledi
AQTAÝ. KAZINFORM — Aqtaý qalasyndaǵy nómiri 23-mekteptiń 10-synyp oqýshysy Arýjan Qojaberdi ózi oqıtyn mekteptiń aınalasyndaǵy qaýipti aımaqtardy zerttep, olardy jaqsartý boıynsha usynys ázirlep, arnaıy joba jasaqtaǵan.
Arýjan — jasóspirimderge arnalǵan áleýmettik-kóshbasshylyq baǵdarlamasynyń qatysýshysy. Ol qoǵamǵa paıdasyn tıgizý maqsatynda — «Safe Way to School» ıaǵnı «Mektepke aparar qaýipsiz jol» jobasyn qolǵa alǵan.
— Jobaǵa shyn yqylasymmen qarap, jaýapkershilikti sezindim. Bul tek tapsyrma emes, naqty ómirlik tájirıbe. Bul joba men úshin mańyzdy. Sebebi ol shynaıy ómirmen baılanysty problemany sheshýge baǵyttalǵan. Biz balalardyń kún saıyn jolda qandaı qaýippen betpe-bet keletinin kórip júrmiz. Trotýar joq, kóshe jaryǵy jumys istemeıdi, jol belgileri jetkiliksiz, júrgizýshiler jaıaý júrginshilerge mán bermeıdi. Osy jaǵdaılar kez kelgen balanyń ómirine qaýip tóndiredi, — deıdi Arýjan.
Arýjan 26-shaǵyn aýdanda turady. Ol atalǵan máselelerdi zerttep, dálelder jınaǵan. Aldymen kórshi, synyptastary men dostarynan saýalnama jınap, suhbat júrgizgen. Sol arqyly oqýshylardyń kúndelikti kóshede qandaı qaýip-qaterlermen betpe-bet keletinin anyqtaǵan.
— Odan keıin joldyń qaı jerlerinde apat jıi bolatyn, jolda nege nazar aýdarý kerek ekenin bilý úshin óz shaǵyn aýdanymyzdyń ýchaskelik polıtsııa qyzmetkerimen kezdesý ótkizdim. Sodan soń, kóshe men ondaǵy kólikterge zertteý júrgizdim. Aınalamdaǵy jol qozǵalysyn baqylap, qaýipti jerlerdi kartaǵa túsirip, naqty máselelerdi belgilep shyqtym, — deıdi oqýshy.
Polıtsııa qyzmetkeri bergen málimetke sáıkes, Arýjannyń úıinen 500 metr jerde eki jyl ishinde 35 jol kólik oqıǵasy tirkelgen. Oqýshy sol derekterdi engizip, onlaın karta jasaǵan.
— Jobany júzege asyrý barysynda shaǵyn aýdan aýmaǵynan birqatar mańyzdy máseleni baıqadym. Ásirese mektep mańyndaǵy jol ótpeleri men jaıaý júrginshilerge arnalǵan belgilerdiń jetispeýshiligi, kólik qozǵalysynyń kóptigine qaramastan baǵdarshamnyń bolmaýy, balalar úshin qaýipti. Júrgizýshilerdiń jyldamdyqty shekten tys asyrýy men jaıaý júrginshilerge jol bermeýi sııaqty zań buzý da jıi kezdesedi, — deıdi ol.
Arýjan Qojaberdi máseleni sheshýge qatysty naqty usynystaryn «Vision Zero» qaǵıdasy boıynsha jasap, fotosýrettermen tolyqtyrǵan. Endi jobany jergilikti quzyrly organdarǵa tanystyrýdy josparlap otyr.
— Men adamdardyń, ásirese balalardyń qaýipsizdigine beı-jaı qaraı almaımyn. Sol sebepti, bul jobany qoǵamǵa paıda ákeletindeı etip jasadym. Osylaısha turǵyndardyń ómirin jaqsartýǵa úles qosqym keledi, — deıdi oqýshy.
Jobamen tanysqan Arýjannyń synyp jetpekshisi Aqzıra Quljanqyzy oqýshynyń bastamasy — qoǵamǵa paıdaly usynys ekenin aıtady.
— Bul zertteý jumysy tek mektep úshin ǵana emes, búkil qala úshin mańyzdy. Balalardyń qaýipsiz jolmen mektepke jetýi — bárimizdiń ortaq mindetimiz. Oqýshy jobasyn jaýapkershilikpen júrgizip keledi, naqty derekter men usynystar jınaǵan, — deıdi muǵalim.
Buǵan deıin, 14 jasta eń jas halyqaralyq grossmeıster atanǵan Aqtaýlyq shahmatshy Edgar Mamedov týraly jazǵan bolatynbyz.