Aqtaýlyq oqýshy halyqaralyq robot tehnıkasy jarysynda bas júlde aldy
AQTAÝ. KAZINFORM – Aqtaýdaǵy «ІT mektep-lıtseıdiń» 10-synyp oqýshysy Nurken Іzbasaruly Ońtústik Koreıanyń Tedjon qalasynda ótken «11th IYRC-International youth robotic competition» bilim berý robototehnıkasy boıynsha halyqaralyq jarysta «Gran Prı» jeńip aldy.
Ońtústik Koreıanyń Tedjon qalasynda ótken “11th IYRC-International youth robotic competition” saıysyna álemniń 20 elinen 1 myńnan astam oqýshy qatysqan. Nurken Іzbasaruly sol myń oqýshynyń ishinen úzdik shyqty.
Nurken Іzbasaruly jarysta «Ormandy qutqarý» baǵyty boıynsha 13 pen 18 jas aralyǵyndaǵy qatysýshylar arasynda baǵdarlamany jyldam ári, sapaly jasap shyqqan.
- Men robototehnıkamen 5 jyldan beri aınalysamyn. Bul — halyqaralyq jarys, álbette, qatty ýaıymdadym. Biraq bári jaqsy ótti. Maǵan Koreıa unady. Bolashaq mamandyǵym robototehnıka jáne IT-tehnologııamen baılanysty bolǵandyqtan, Koreıa memleketiniń joǵary oqý ornyna túskim keledi. Zor qoldaýyn bildirgen jattyqtyrýshym men ata-anama óz alǵysymdy aıtamyn, - deıdi Nurken Іzbasaruly.
Osy oraıda bas bapker Dmıtrıı Kýrıchev shákirtiniń syn saǵatta qandaı qıyndyqty bastan keshkeni týraly aıtyp berdi.
- Baǵdarlamany birge ázirledik. Nurken de azdap qobaljydy. Onyń ústine qarsylastary myqty boldy. Koreıa, Qytaı, Malaızııa, Taıland, Laos, Reseı, Qazaqstan, Brazılııa, Úndistan, Aljır, Izraıl, Irak, Indonezııadan myńnan astam bala qatysty. Biraq Nurken tapsyrmany jaqsy oryndap, jeńiske jetti. Biz ony jeńisimen quttyqtaımyz, - dedi Dmıtrıı Kýrıchev.
