Aqtaýlyq oqýshy: Erikti bolý – el ıgiligine jumys isteý
AQTAÝ. KAZINFORM – Qoǵamdyq jumystarǵa belsene atsalysyp júrgen eriktilerdiń qoǵamdaǵy atqaratyn qyzmeti orasan. Osyndaı ıgilikti istiń basy-qasynda júrgen aqtaýlyq mektep oqýshysy Amangúl Jamken eriktiler qatarynda paıdaly iske óz úlesin qosýda.
Aqtaý qalasyndaǵy Isataı Súıeýbaev atyndaǵy № 8 mekteptiń 11-synyp oqýshysy Amangúl Mıllıatqyzy erikti bolyp jumys isteýdiń ózi úshin asa mańyzdy ekenin aıtady. Ol oqýshy bolǵanyna qaramastan sabaqtan tys ýaqytta Mańǵystaý oblystyq jastar resýrstyq ortalyǵy janynan qurylǵan eriktiler jasaǵymen birge qaıyrymdylyq isine atsalysady.
«Erikti bolyp jumys istep júrgenime bıyl úsh jylǵa jýyqtady. Áýeli jaqyn qurbymmen birge kelisip qoǵamdyq jumystarǵa qatystyq. Al ata-anam sabaǵyma kedergi keltiredi dep qarsy bolǵan. Keıin kelisimin berip, únemi qoldaý bildiredi. Qolymyz qalt etkende oblystyq jastar resýrstyq ortalyǵyndaǵy áriptesterimmen birge jumys atqaramyz. „Kelisim boıynsha uıymdastyrýshy tarapqa bos ýaqytymdy aldyn ala aıtyp otyramyn. Osylaısha biz tústen keıin 3-4 saǵat qoǵamdyq jumystarǵa qatysamyz. Mysaly, Qazaqstan halqy assambleıasynyń Mańǵystaý oblystyq fılıalynda erikti retinde uıymdastyrýshy qyzmetin atqaramyn. Jastar ortalyǵy bizdi únemi túrli trenıngterge qatystyrady. Osyǵan deıin sheshendik óner, qarjylyq saýattylyq sekildi taqyryptar boıynsha ótken sabaqtarǵa qatysyp, biraz sabaq aldyq», - deıdi jas erikti Amangúl Jamken.
16 jastaǵy keıipkerimiz Aqtaýdaǵy birqatar is-sharada boı kórsetip júr.
«Erikti retinde is-sharalarǵa aralasyp ǵana qoımaı jastardyń basyn qosý maqsatynda ár túrli gıtara keshi, poezııa keshin uıymdastyramyz. Mańǵystaý oblystyq volonter korpýsy qaıyrymdylyqpen aınalysyp ǵana qoımaı ár-túrli qoǵamdyq isterge qol ushyn sozýǵa ár daıym daıyn. Budan bólek, «Júregi toly meıirim», «Bolashaqqa senimmen», «Іs-qaǵaz júrgizýshisi», «Bizdiń ýaqyt», «Medııa jobasy», «Nashaqorlyqqa jol joq» sekildi jobalarmen aınalysamyz. Bizdiń maqsatymyz – jastardyń bos ýaqytynda túrli jaman is-áreketterge barǵansha, erikti bolyp ýaqytyn paıdalý ótkizýge septigimizdi tıgizý», - deıdi Amangúl Jamken.
Búginde Mańǵystaý oblystyq jastar ortalyǵynyń eriktisi sanalatyn Amangúl atqarǵan jumystaryn jaýapty tarap únemi baqylap otyratynyn jetkizdi.
«Qazir Mańǵystaý oblysyna kórshi óńirdiń Jylyoı aýdanynan sý tasqynyna baılanysty kóptegen turǵyn evakýatsııalandy. Osy oraıda biz erikti retinde jastar ortalyǵynda qala turǵyndarynan gýmanıtarlyq kómek jınadyq. Halyq tapsyrǵan kıim-keshek, tósek-oryn, azyq-túlikterdi suryptap, qaladaǵy birneshe evakýatsııalyq pýnkterge jiberip otyramyz. Men úshin bul jumys adamnyń jaýapkershiligin shyńdap, qoǵamǵa óz úlesimdi qosýǵa múmkindik», - deıdi Amangúl Jamken.
Ol otbasynda úsh uldyń ortasynda ósip kele jatqan jalǵyz qyz. Eki aǵasy men baýyry onyń qaıyrymdy ıisine qurmetpen qaraıdy.
«Úıde erikti retinde atqarǵan jumysyma bári túsinistik tanytady. Bıyl mektepti aıaqtaımyn. Almatydaǵy QazUÝ-dyń jýrnalıstıka fakýltetine qujat tapsyrýdy kózdep otyrmyn. Qazir UBT-ǵa daıyndalyp júrmin», - dedi aqtaýlyq erikti Kazinform tilshisine bergen suhbatynda.
