Aqtaýlyq oqýshy energetıkalyq sýsyndardyń quramyn zerttedi

Aqtaý qalasyndaǵy Nazarbaev zııatkerlik mektebiniń 10-synyp oqýshysy Erkebulan Balǵabekov energetıkalyq sýsyndardyń hımııalyq quramyna tájirıbe jasady, dep habarlaıdy Kazinform.

Oqýshy energetıkalyq sýsyndar ortalyq júıke júıesiniń qozýyna áser etetinin ǵylymı jobasynda zerttep, qorǵaǵan.

Erkebulan Balǵabek jastar arasynda óte tanymal Redbull, Gorilla, Adrenaline sekildi energetıka sýsyndaryna synaq júrgizdi.

Ol sýsynǵa sapalyq analız jasaý arqyly pH tabý kezinde atalǵan sýsyndardyń qyshqyly joǵary ekenin anyqtady. Al qyshqyl sýsyn tutyný saldarynan súıek, sińir zardap shegedi, sonymen qatar aǵzanyń qartaıý protsesi jedeldeıdi. 

— Túrli derekkózderdi taldaý barysynda energetıkalyq sýsyn quramyndaǵy komponentterdiń jas aǵzaǵa paıdasynan gór zııany áldeqaıda kóp ekenin anyqtadyq. Búkil jınalǵan aqparatty saralap, kámelet jasyna tolmaǵan jasóspirimderdi qýattyǵysh sýsyndardy múldem tutynbaýǵa, al, 18 jasqa tolǵan adamdardy energetıkalyq sýsyndy táýligine 0,3 lıtrden asyrmaı ishýge shaqyramyn, — deıdi Erkebulan Balǵabek.

Hımııa pániniń muǵalimi Venera Sýrovtsevanyń aıtýynsha, qazir energetıkalyq sýsyn shyǵaratyn kompanııalar onyń tolyqtaı qaýipsiz ekenin aıtady. Alaıda, ár komponenttiń aǵzaǵa belgili bir zııany bolatynyn eskergen jón.

— Ony qarapaıym jolmen — energetıkalyq sýsyndy ishkenge deıin jáne keıingi ózińizdiń qan qysymyńyzdy ólsheý arqyly baıqaı alasyz. Kóp memleketterde energetıkalyq sýsyndy arnaıy dárigerdiń nusqaýymen dárihanadan ǵana alýǵa bolady, al bizde kez kelgen dúkenniń sórelerinde turady. Bul sýsyndy eshqandaı baqylaýsyz ishý, ásirese jastardyń shekten tys paıdalanýy júrek aýrýynyń jasarýyna ákep soǵady, — deıdi Venera Sýrovtseva.