Krımınalıst: Keıde qylmys ornynda 6-7 saǵat úzdiksiz jumys isteımiz

– Krımınalıstıka salasyn tańdaýyńyzǵa ne sebep boldy?

– Krımınalıst - qylmys bolǵan jerdiń izderin anyqtap, qylmys jasaǵan tulǵany tabýǵa atsalysatyn jaýapty qyzmet. ıAǵnı, bizdiń jumys – qylmys ornyn tekserip, saýsaq izderi, trasologııalyq izder, DNK jáne basqa da bıologııalyq aıǵaqtardy alý, tirkeý jáne bekitý. Meniń bul mamandyqty tańdaýyma bala armanym sebep boldy. Ákem Bekbolat Súleımenov ishki ister organynda qyzmet etken. Ákemnen tórt jasymda aıyryldym. Sol sebepti onyń jolyn jalǵap, áke armanyn oryndaǵym keldi.

– Bilim jolyńyz ben qyzmettegi alǵashqy qadamdaryńyz týraly aıtyp berseńiz?

– Men 1994 jyly Jańaózen qalasynda dúnıege kelip, №3 orta mektepti aıaqtadym. Keıin Almaty qalasyndaǵy Іshki ister mınıstrliginiń Almaty akademııasyna oqýǵa tústim. Oqýymdy támamdaǵan soń, 2015 jyly Jańaózen qalasynyń polıtsııa basqarmasyndaǵy jedel-krımınalıstıka bóliminde krımınalıst bolyp eńbek jolymdy bastadym.

– Alǵash qylmys ornyna barǵan sátińiz esińizde me?

– Iá, alǵashqy sátter eshqashan umytylmaıdy. Alǵash qylmys ornyna kelgende qatty qobaljydym. Іshteı qorqynysh bolǵanymen, ony bildirmeýge tyrystym. Ol jol-kólik apaty edi, ishinde birneshe adam qaza tapqan bolatyn.

Sol kezde tórt jyl boıy alǵan bilimim men jınaǵan tájirıbem maǵan úlken kómek boldy. Ózimdi birden qolǵa alyp, jumysqa kiristim. Sol sátte krımınalıst mamandyǵy tek bilimdi ǵana emes, ustamdylyq pen sabyrlylyqty talap etetinin anyq túsindim.

– Jalpy, bul mamandyqtyń ereksheligi nede dep oılaısyz?

– Qylmys salasy álsiz adamdardy keshirmeıdi. Bul jerde myqty júıke men sabyrly sana qajet. Krımınalıst mamandyǵynda er nemese áıel dep bóliný bolmaıdy. Іzdi anyqtaý sheberligi, baıqampazdyq jáne ıntýıtsııa - tájirıbemen keletin qabiletter. Eń bastysy - óz isińdi shyn júrekten súıý. Bizdiń jumysymyzdyń nátıjesi - qylmystyń ashylýy.

– Jumysyńyzdyń qıyndyqtary týraly ne aıtasyz?

– Qylmys ornyn zertteý - óte kúrdeli ári uzaq protsess. Tipti kishigirim urlyqtyń ózin anyqtaý - úlken eńbek. Іzderdi tabý, olardy durys tirkeý, dálelderdi jınaý kóp ýaqytty qajet etedi.

Keıde qylmys ornynda 6-7 saǵat boıy úzdiksiz jumys isteıtin kezderimiz bolady. Urlyq, jol-kólik apattary, kisi ólimi sııaqty túrli jaǵdaılarda jumys isteımiz. Bul salada muqııattylyq pen tózimdilik asa mańyzdy.

– Osyndaı jaýapty qyzmetpen qatar otbasylyq ómirdi qatar alyp júrý qıyn emes pe?

– Árıne, belgili bir deńgeıde qıyndyqtary bar. Degenmen áıel adamnyń rýhy myqty bolsa, ómirdiń barlyq salasyn qatar alyp júrýge bolady dep oılaımyn. Men óz jarymdy da osy saladan taptym. Otbasylyq ómir men qyzmetti úılestirýge tolyq múmkindik bar.

–Mamandyq tańdaýda qyzdarǵa qandaı keńes berer edińiz?

– Ómirde eki nárseden qatelespeý kerek, sonyń biri - mamandyq. Qaı salany tańdasań da júrek qalaýymen barý kerek. Krımınalıst mamandyǵy - baısaldylyqty, salqynqandylyqty jáne úlken jaýapkershilikti talap etedi. Únemi izdeniste bolyp, ózińdi damytyp otyrý qajet.

– Sizdiń ómirlik ustanymyńyz qandaı?

– Árbir isti júrekpen jasaý, ádildik úshin kúresý. Qıyndyq pen qaýipke toly bul mamandyqta náziktik pen tabandylyqty qatar alyp júrý ekiniń biriniń qolynan kele bermeıdi. Degenmen óz isine adal adam kez kelgen qıyndyqty jeńe alady dep senemin.

Hanshaıym Bekbolatqyzy – búginde tek qylmystyń izin anyqtaıtyn maman ǵana emes, qoǵamdaǵy ádilet pen senimniń sımvolyna aınalǵan tulǵa. Onyń tabandylyǵy men kásibine degen adaldyǵy kóptegen jas qyz-kelinshekterge úlgi bolyp, «áıeldiń qolynan kelmeıdi» degen túsinikti joqqa shyǵaryp keledi. Árbir ashylǵan is - onyń kásibı biliktiliginiń aıqyn dáleli.

Buǵan deıin, Sýretshige shabyt emes, áreket kerek - jas sýretshimen suhbat usynǵan bolatynbyz.