Aqtaýlyq dárigerler naýqastyń moınynan 1 kelideı isikti alyp tastady
AQTAÝ. KAZINFORM – 74 jastaǵy Jańaózen qalasynyń turǵyny Balhııa Súndetbaevanyń moınyndaǵy isik 15 jyl buryn paıda bolǵan. Osy kezge deıin ol ulǵaıyp, zeınetkerge kóp qıyndyq ákelgen. Qatty aýyrsyný men turaqty dene qyzýynyń kóterilýine shydaýǵa týra kelgen.

Aqtaýlyq bilikti mamandar ota jasamas buryn, naýqastyń densaýlyǵyn muqııat tekserip, isiktiń qaýipti aımaqta ornalasqanyn anyqtady. Ol iri qan tamyrlary men júıke talshyqtaryna tym jaqyn ornalasqan bolyp shyqty. Dese de, mamandar táýekelge bel býyp, ota jasaǵan.
Dárigerler toby asa kúrdeli otany 4 saǵat jasap, 1 kelige jýyq isikti sátti alyp tastady.
Otadan keıin naýqastyń qan qysymy men jalpy densaýlyq kórsetkishteri qalypqa kelip, aýyrsynýsyz uıyqtaı bastaǵan.
- Dárigerler maǵan ekinshi ómir syılady. Ómir boıy olarǵa alǵysymdy aıtamyn, - deıdi Balhııa Súndetbaeva.
Buǵan deıin, Mańǵystaýlyq qutqarýshylar Atyraý oblysyna kómekke attanǵany týraly jazǵan bolatynbyz.