Aqtaýlyq dárigerge qol kóterý faktisi: Densaýlyq saqtaý mınıstri oqıǵaǵa baılanysty pikir bildirdi
ASTANA. KAZINFORM — Densaýlyq saqtaý mınıstri Aqmaral Álnazarova Aqtaýdaǵy balalar aýrýhanasynda er adamnyń dárigerge qol kóterý jaǵdaıyna qatysty málimdeme jasady.
Úkimet otyrysynan keıingi baspasóz konferentsııasynda ol oqıǵanyń qalaı órbigenin tolyqtaı túsindirdi. Mınıstrdiń aıtýynsha, naýqas balaǵa appendıtsıt dıagnozy qoıylyp, aýrýhanada tıisti ota jasalǵan. Alaıda áke-sheshesi ary qaraı em qabyldaýdan bas tartyp, qolhat jazyp, perzentin alyp ketken. Úıde jaǵdaıy nasharlaǵan soń, balany aýrýhanaǵa qaıta ákelgen. Bir kún jatqyzyp, qolhat jazyp, ony ekinshi ret taǵy alyp ketken. Ulynyń hali asqynǵan soń, aýrýhanaǵa úshinshi ret jetkizgen.
— Eki jaqtan da kinási dáleldengen kináliler zań aıasynda jaýapkershilikke tartylady. Ata-ananyń jaýapkershiligi de, meniń oıymsha, nazardan tys qalmaýy kerek. Atalǵan balany ata-anasy kem degende eki ret qolhat jazyp qaldyryp, aýrýhanadan alyp ketken. Aýrýhanaǵa jalpy úsh ret alyp kelgen. Eń bastysy, balanyń jaǵdaıyn oılaý kerek. Qylmystyq is qozǵaldy. Eki jaqtyń da jaýapkershiligi tolyqqandy tergeledi. Men ata-anaǵa da, dárigerge de arasha túspeımin. Bári zań aıasynda qaralady, — dedi mınıstr.
Onyń sózinshe, medıtsınalyq qyzmetkerge qol kótergeni úshin ata-anany jaýapkershilikke tartatyn normalar bar. Dáriger nemquraıly qaraǵany dáleldense, oǵan da zań aıasynda birqatar shara qarastyrylǵan.
Aıta keteıik, buǵan deıin dárigerge shabýyl jasaý faktisine baılanysty densaýlyq saqtaý basqarmasy oqıǵanyń mán-jaıyn jarııalaǵan edi.
