Aqtaýlyq bloger sot sheshimimen Instagram-daǵy vıdeosyn óshirýge mindetteldi
ASTANA. KAZINFORM — Aqtaý turǵyny Instagram paraqshasynda jarııalaǵan vıdeosy úshin sot aldynda jaýap berdi. Sot blogerge daýly vıdeony óshirýdi jáne jábirlenýshilerge moraldyq ótemaqy tóleýdi mindettedi. Bul týraly QR Joǵarǵy soty habarlady.
Іs materıaldaryna sáıkes, bloger qylmystyq is boıynsha júrgizilgen tergeý áreketteriniń bir sátin vıdeoǵa túsirip, ony áleýmettik jelidegi paraqshasynda jarııalaǵan. Jazbada osy iske qatysy bar qala turǵyndary kórsetilgen.
Alaıda azamattar ózderiniń beınesin jarııalaýǵa kelisim bermegenin aıtyp, sotqa shaǵymdanǵan. Olar vıdeony óshirýdi jáne moraldyq zııan úshin ótemaqy tóleýdi talap etken.
Aqtaý qalalyq № 2 soty isti qarap, jaýapkerdiń ózin qoǵam qaıratkeri nemese shtattan tys jýrnalıst retinde tanystyrýǵa qatysty ýájderin qabyldamaǵan. Sot sheshiminde jarııalanǵan materıal azamattyń kelisiminsiz paıdalanýǵa bolatyn jaǵdaılarǵa jatpaıtyny kórsetilgen.
Sondaı-aq sot beınejazbaǵa jazylǵan pikirler men onyń kópshilikke taralýy talap qoıýshylarǵa moraldyq zııan keltirgenin anyqtaǵan.
Sot blogerdi Instagram paraqshasyndaǵy vıdeony óshirýge jáne eki azamattyń árqaısysyna 200 myń teńgeden, jalpy 400 myń teńge kóleminde moraldyq ótemaqy tóleýge mindettedi.
Sot sheshimi zańdy kúshine endi.
Eske salaıyq, buǵan deıin Almatyda ákesinen zorlyq kórgenin aıtqan bloger qyz 10 táýlikke qamalǵanyn jazǵanbyz.
