Aqtaýlyq ata-analar memlekettik mektep ashýdy suraıdy

AQTAÝ. KAZINFORM – Qaladaǵy 16-shaǵyn aýdanda áli kúnge memlekettik mektep joq. Oqýshylar qazir jekemenshik lıtseıde tegin oqıdy. Alaıda kásipker kelesi oqý jylynan bastap aqyly bolatynyn habarlaǵan.

Oqý aqysy bir balaǵa - 100 myń teńge. Sondyqtan ata-analar «Jaıly mektep» Ulttyq jobasy aıasynda salynyp jatqan mekteptiń qurylysyn jedeldetýdi surap, oblystyq ákimdiktiń aldyna jınaldy.

- Aqyly oqytýǵa shamamyz kelmeıdi. Bir úıde birneshe bala bar ǵoı, ár qaısysyna 100 myńnan qalaı tóleımiz. Demek, myna mektep ashylǵansha, balalardy basqa shaǵyn aýdandardaǵy mektepterge tasymaldaýǵa týra keledi, - deıdi qala turǵyny Yrzagúl Saqtaǵanova.

Ata-analar balany tasymaldap oqytýdyń qıyndyqtaryn aıtady. Shaǵyn aýdan ishinde memlekettik bilim berý uıymy ashylsa, alańsyz jumysqa keter edik, - deıdi olar.

Aqtaý qalalyq bilim bóliminiń basshysy Ǵanı Qurmanǵalıevtiń aıtýynsha, osy másele boıynsha alda jıyn ótedi.

- Jekemenshik mektep osy oqý jylynda tegin oqýmen qamtamasyz etti. Endi aqyly oqytamyz dep otyr. Jalpy 16-shaǵyn aýdanda 1500 oryndyq mektep salynyp jatyr. Onyń qurylysy oblys ákimdiginiń baqylaýynda. 28-mamyr kúni turǵyndar, mektep basshylyǵy barlyǵymyz jınalyp, máseleni sheshemiz, - deıdi Ǵanı Qurmanǵalıev.

Aıta keteıik, 16-shaǵyn aýdanda boı kótergen mekteptiń qurylysy byltyr shilde aıynda bastalǵan. Sheneýnikter ony bıyl qazanda iske qosýdy kózdep otyr. Onyń qurylysyna «Jaıly mektep» Ulttyq jobasy aıasynda bıýdjetten 8 mıllıard 83 mıllıon teńgege jýyq qarajat bólingen.

Buǵan deıin, Mańǵystaýda jaǵajaıdy búldirip, jazý jazyp ketken turǵynǵa aıyppul salynǵany týraly jazǵan bolatynbyz