Aqtaýlyq 9 adamnyń 70 mln teńgesin jymqyrǵan alaıaq sottaldy

ASTANA. KAZINFORM – Aqtaýda úleskerlerdiń qarajatyn jymqyrý faktisi boıynsha aıyptaý úkimi shyqty

QMA Mańǵystaý oblysy boıynsha departamenti júrgizgen tergep-tekserý barysynda Kornıenko N.N. eshqandaı ókilettigi bolmasa da, ózin «SK 2032» turǵyn úı-qurylys kooperatıviniń basshysy retinde kórsetip, «MIZAM» kópqabatty turǵyn úı keshenindegi páterlerdi satýǵa qatysty 9 kelisimshart jasaǵany anyqtaldy.

Osylaısha ol azamattardyń 70 mıllıon teńge kólemindegi qarajatyn jeke qajettilikterine jumsaǵan.

- Sot sanktsııasymen kúdiktiniń jalpy quny 200 mln teńge bolatyn 8 myń sharshy metr jer telimine tyıym salyndy.

Sot úkimimen Kornıenko N.N. 5 jylǵa bas bostandyǵynan aıyryldy, - delingen habarlamada.

Múlikke salynǵan tyıym jábirlenýshilerdiń azamattyq talaptaryn óteý úshin paıdalanylatyn boldy.

Aıta keteıik, agenttikte qarjy pıramıdalarynyń belgilerin tekserýge múmkindik beretin «Baiqa, piramida!» Telegram-boty jumys isteıdi.

Eske salaıyq, SQO-da Sincere Systems Group qarjy pıramıdasynyń qyzmeti toqtatyldy.