Aqtaýǵa Ystanbuldan ushyp kelgen 11 jolaýshy karantındik statsıonarǵa jatqyzyldy

AQTAÝ. QazAqparat - Aqtaýǵa Ystambuldan ushyp kelgen 11 jolaýshy karantındik statsıonarǵa jatqyzyldy. Bul týraly Mańǵystaý oblysynyń qoǵamdyq kommýnıkatsııa ortalyǵynda ótken brıfıngide Mańǵystaý oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Ǵazız Nadýev málim etti.

Onyń aıtýynsha, túnde «Ystanbul - Aqtaý» baǵytyndaǵy reıs Aqtaý halyqaralyq áýejaıyna qondy. Bortta 94 jolaýshy bolǵan. Reıstegilerdiń barlyǵy Qazaqstan azamattary. Anyqtamasy bar 83 jolaýshy úılerine qaıtaryldy. Al, 11 adam 1 shaǵyn aýdanda ornalasqan statsıonarǵa jatqyzyldy. Jolaýshylardan alynǵan PTR test teris nátıje bergen jaǵdaıda úılerine jiberiledi.

«Búgingi tańda shetelden ushyp kep jatqan Qazaqstan azamaty bolsyn, basqa eldiń azamattary bolsyn bárine termometrııa ótkiziledi. Jáne de saýalnama toltyrady. Sondyqtan da ol temirjol bolsyn, teńiz jolymen bolsyn, mashınamen kelip jatqan kisiler osyndaı qatań tekserispen esepke alynady», - dedi Mańǵystaý oblysynyń Bas sanıtar dárigeri Ǵazız Nadýev.

Aqtaý áýejaıy ázirge tek halyqaralyq reısterden Ystanbul-Aqtaý baǵytynda ǵana ushaqtar qabyldaýda. Áýe reısi aptasyna 3 ret qatynaıdy.

Eske sala keteıik, QR Bas sanıtarlyq dárigeri Erlan Qııasovtyń memlekettik shekaradaǵy ótkizý pýnkterinde koronavırýs ınfektsııasynyń aldyn alý sharalaryn odan ári kúsheıtý týraly jańa qaýlysy 6 qazanda saǵat 00:00-de kúshine endi.

Jańa erejege sáıkes birqatar shekteý qoldanylady. Qazaqstanǵa shetelden kelgen ushaq jolaýshylarynyń barlyǵy termometrııadan ótip, saýalnamaǵa jaýap beredi jáne COVID-19-ǵa qarsy PTR-testiniń oń nátıjesi týraly anyqtamany usynýy tıis. Qazaqstan Respýblıkasynyń memlekettik shekarasynan ótý kezinde 72 saǵattan aspaǵan anyqtama ǵana jaramdy.