Aqtaýǵa kireberis joldar keńeıtiledi
AQTAÝ. QazAqparat - Aldaǵy ýaqytta Aqtaýǵa baǵyttalǵan joldar keńeıtilip, 4 jolaqty bolady. Eldi mekenderden qalaǵa baǵyt alǵan jolaýshylar 1-sanatty tas jolmen qatynaıdy, dep habarlaıdy QazAqparat tilshisi.
Bul týraly Aqtaý qalalyq jolaýshylar kóligi jáne avtomobıl joldary bólimi basshysynyń orynbasary Beksultan Shalabaev málim etti.
Joba oblys ákimi Eraly Toǵjanovtyń bastamasymen qolǵa alynady. Qarajat jergilikti bıýdjetten bólinbek.
Aldymen, Aqtaý-Jańaózen baǵytyndaǵy tasjoldyń qalaǵa kirer bóligi keńeıtiledi. Bul 17 beket pen HGMZ aralyǵy jáne zaýyttan 1 shaǵynaýdanǵa deıin aralyqty qamtıdy. Qazirgi kezge deıin 23, 24, 28 a shaǵynaýdan burylysyna deıin qurylys bastalǵan. Oǵan bıýdjetten 1 mlrd. 708 mlnteńge bólingen.
Al, Aqtaý - Aqshuqyr baǵyty tas jolyn keńeıtý úshin jobalyq-smetalyq qujattary daıyndalyp, ózgerister engizilýde.
Jalpy, ótken jyly oblys ákiminiń tapsyrmasymen 7 joldyń qurylysy bastalǵan. Onyń eń mańyzdysy- hab joly. Ol 16-17 shaǵynaýdan, Munaıshydan bastap 19 a shaǵynaýdanǵa deıin aralyqty qamtıdy.
Aqtaý qalalyq jolaýshylar kóligi jáne avtomobıl joldary bólimi basshysynyń orynbasary Beksultan Shalabaevtyń aıtýynsha, hab joly - eń mańyzdy bolyp sanalǵannan keıin, bıyl bitirý kózdelip otyr.
«Sodan keıin №9 jol dep aıtamyz. 22 shaǵynaýdan qasy. Merdiger kestesine saı, qurylys jumystary 7 aıǵa sozylmaq. 33, 34, 34a shaǵynaýdan boıy, 31b, 32b shaǵynaýdandy aralyǵyn qamtıtyn №26 jol bar. Sonymen birge, 32b-35 shaǵynaýdan aralyǵyn jalǵa jatqan №24 joldyń qurylysy júrýde»,-deıdi Beksultan Shalabaev.
Sondaı-aq, bıyl 12 shaǵynaýdan "Munaıshy" sport kesheninen bastap, 19 shaǵynaýdanǵa deıingi jol ashylmaq. Sonymen qatar, jańa shaǵynaýdandardyń ortalyq jolyn salý úshin konkýrs júrip jatyr. Oǵan 74 mln teńge bólingen.
