Aqtaýǵa fýtbol qaıta oraldy
MAŃǴYSTAÝ. QazAqparat - Aqtaýǵa úlken fýtbol qaıta oraldy. «Jas qanat» stadıonynyń jaramsyzdyǵynan «Kaspıı» klýby úsh jyldan beri ózge óńirlerde jattyǵyp kelgen bolatyn. Bıyl stadıon tolyqtaı kúrdeli jóndeýden ótti, dep xabarlaıdy QazAqparat tilshisi.
«Kaspıı» fýtbol klýby óz oıyndaryn úsh maýsym Shymkent qalasynda ótkizip keldi. 12 jyl boıy jóndeý kórmegen «Jas qanat» stadıonynda birneshe aı buryn bastalǵan qurylys jumystary aıaqtaldy.
ÝEFA talaptaryna saı jasaqtalǵan stadıon alańymen qosa, qaqpalar, kıim aýystyratyn bólmeler, tablo men oryndyqtar da jańarǵan.
«Oblys basshysynyń bastamasymen demeýshiler arqasynda stadıon alańy jóndeýden ótti. Kóp jumys atqaryldy. Stadıonnyń qazirgi jaǵdaıy Qazaqstan fýtbol federatsııasynyń talaptarynan tolyqtaı shyǵyp tur. Endi oıynshylar da jańa stadıonǵa saı óner kórsetedi dep senemiz»,- dedi «Kaspıı» FK dırektorynyń orynbasary Andı Djýmaev.
Sý jańa stadıonǵa bárinen buryn fýtbolshylar rıza. Olar óz alańynda oınaý kúsh beredi dep sanaıdy. Sondaı-aq, basqa aımaqtarda daıyndalyp, match ótkizý týrnır kestesine de áser etken.
Aıta keteıik, klýb jańa oıynshylarmen tolyqty, bapkeri de aýysty. Qazir topty serbııalyq maman jattyqtyrady.
Bas bapkerdiń kómekshisi Sava Kovachevıchtiń aıtýynsha, maýsym sońyna deıin alty kezdesý josparlanǵan. Sondyqtan oıyndarda barynsha múmkin bolǵan upaıdyń barlyǵyn alýǵa tyrysý kerek. Qazir komanda quramynyń áleýeti de ázirligi de jetedi.
Uzaq úzilisten keıingi alǵashqy oıyndy aqtaýlyqtar almatylyq «Qaırat A» komandasyna qarsy ótkizdi.
Oıyn 3:3 esebimen teń aıaqtaldy. Match sońynda oblys ákimi Eraly Toǵjanov jergilikti fýtbolshylarǵa jańa avtobýstyń kiltin tabystady.
