Aqtaýǵa 3 myńǵa jýyq qoqıqaz ushyp keldi
Mamandardyń aıtýynsha, Aqtaýǵa qoqıqazdar Aqmola oblysyndaǵy Qorǵaljyn memlekettik tabıǵı qoryǵynyń aýmaǵyndaǵy Teńiz jáne Qorǵaljyn kólderinen ushyp kelgen.
Aýa raıy sýytqan soń ońtústikke, ıaǵnı Hazar qoryǵyna nemese odan da ári Iran jaqqa ótip ketedi.
«Júzdegen qoqıqaz Qarakólde qystap qalýy múmkin. Qarakólden basqa olar Túpqaraǵan aýdany tóńiregindegi Túlen araldarynda bolady, ol jerde sý qatqan jaǵdaıda Qarakólge keledi. Ómir súrýge qolaıly jaǵdaıǵa baılanysty eki ortada aýysyp otyrady»,-deıdi «Tabıǵı orta» Batys Qazaqstan ÚEU óńirlik qaýymdastyǵy keńesiniń tóraǵasy Ádilbek Qozybaqov.
Ádilbek Qozybaqovtyń aıtýynsha, Qarakól aýmaǵy – «Qyzyl kitapqa» engen qanattylar turaqtaıtyn meken. Sondyqtan da bul jer tabıǵat qorǵaý ınspektorlarynyń jiti baqylaýynda.
Aıta keteıik, qyzǵylt tústes, iri deneli qustar, negizinen tropıkalyq elderde uıa salady.
