Aqtaýdyń sanıtarlyq dárigeri «Rıksos» qonaqúıin tekserdi
Qalalyq sanıtarlyq qyzmet mamandary, ákimdik jáne BAQ ókilderinen quralǵan mobıldi top «Aqtaý Rıksos» kýrort aımaǵynyń sanıtarlyq normasyn tekserdi. Josparly tekserýge qonaq úıiniń aýmaǵyndaǵy meıramhana, qoǵamdyq tamaqtaný oryndary, sondaı-aq basseın men oǵan irgeles aýmaqtar kirdi. Jumys barysynda «Aqtaý Rıksos» qyzmetkerlerine saqtyq sharalaryn ustaný boıynsha túsindirý jumysy júrgizildi.
Baspasóz qyzmetiniń málimetinshe, kýrort ókilderi sanıtarlyq normalardy saqtap kelgen.
«Bizde tekserý qonaqtar áýejaıǵa kelgen sátten bastalady. «Resepshn desk» jumys isteıdi. Mamandar kelgen qonaqtardyń dene qyzýyn sensor termometrmen tekseredi. Sodan keıin qonaqúı kóligine otyrǵyzyp, jetkizedi. Biz birden maska, sanıtaızer taratamyz. Árıne, qashyqtyq saqtalady. Qonaq úıge kire beriste qonaqtardyń dene qyzýy qaıta ólshenedi. Ári qaraı, bagaj dezınfektsııalanyp, sodan keıin ǵana bólmege jiberiledi. Bólmelerge únemi dezınfektsııa jasalady. Meıramhana men barda barlyq norma qatań saqtalady. Bizdiń qonaq úıde arnaıy sanıtarlyq dáriger bar. Qonaqta syrqattyń belgisi paıda bolǵan kezde biz jedel járdem shaqyramyz. Biz barlyq sanıtarlyq talaptardy qatań saqtaımyz jáne qonaqtarymyzdyń qaýipsizdigin qadaǵalaımyz«, - dedi qonaqúı menedjeri Serik Isaǵalıev.
Ákimdik, sanıtarlyq qyzmet ókilderi, polıtsııa jáne baspasóz qyzmetkerleri bar mobıldi top «Rıksos« qonaq úıine karantın rejımi men dezınfektsııalyq rejımniń saqtalýyna reıd júrgizdi.
«Qonaqúı basshylyǵyna sanıtarlyq talaptardy saqtaý, sondaı-aq baqylaý men qadaǵalaýdy júzege asyrý kezinde sýbektiniń quqyqtary men mindetteri týraly túsinikteme berildi», - dedi Aqtaý qalasy taýarlar men qyzmetterdiń sapasy men qaýipsizdigin baqylaý basqarmasynyń basshysy Ásıma Jarylǵasova.
