Aqtaýdyń 55 jyldyǵyna oraı uıymdastyrylatyn sharalar eki kúnge sozylady
AQTAÝ. QazAqparat - Aqtaýdyń 55 jyldyǵyn qala turǵyndary saltanatty túrde atap ótpek, dep habarlaıdy QazAqparat tilshisi.
Kaspıı jaǵasynda ornalasqan ásem qala - gaz ben munaı óndiretin ónerkásip ortalyǵy. El turǵyndarynyń bergen baǵasy boıynsha, bul eń taza shahar. Sondaı-aq, kóshesine ataý berilmeıtin Qazaqstannyń erekshe qalasy sanalady.
55 jylda shaǵyn qala soltústik batysqa qaraı keńeıip, túrli záýlim ǵımarattar boı kóterdi. Demografııalyq kórsetkish te qarqyndy damýda. Qazir qala halqynyń sany - 200 myńǵa jýyq.
Merekeni qala turǵyndary 2 kún qatarynan atap ótpek.
21 qyrkúıekte saǵat 11.00-de «Abaı» atyndaǵy mádenıet kesheninde Aqtaý qalasynyń tarıhynan syr shertetin sýretter kórmesi ótedi.
Saǵat 15.00-de «Abaı» atyndaǵy mádenıet kesheni aldynda Abaı eskertkishi ashylady. Al, keshki saǵat 17.00-de 15-shaǵyn aýdandaǵy teńiz jaǵalaýynda sporttyq sharalar ótedi.
Erteń «Túp-tórkinin tórge ozdyrǵan Mańǵystaý» taqyrybynda etnografııalyq festıval 15-shaǵyn aýdandaǵy teńiz jaǵalaýynda saǵat 18.00-de bastalady. Munda turǵyndar shubat ishýden jarysyp, kórmeni tamashalaı alady. Saǵat 19.00-de 15-shaǵyn aýdandaǵy amfıteatrda «Týǵan kúnińmen, súıikti qalam!» taqyrybynda gala-kontsert ótedi.
Al, 22 qyrkúıek kúni ulttyq sporttyń tóresi - sáıgúlikterdiń alaman báıgesi ótedi. Sonymen birge qyz qýý bolyp, bilegi myqty jigitter boz kilemde beldesedi. Saǵat 17.00-de teńiz jaǵalaýynda sporttyq sharalar uıymdastyrylady. Keshki saǵat 18.30-da Qazaqstan halqy assambleıasy shyǵarmashylyq ujymdary kontsert qoıady, sondaı-aq qalanyń qurmetti azamattarymen kezdesý ótedi.
Bul sharadan «Nur Shah» sán úıi de qalys qalmaıdy. Teńiz jaǵalaýynda sán úıiniń toptamalaryn kórsetpek.
Sol kúni, keshki saǵat 20.00-de estrada juldyzdarynyń qatysýymen «Aqtaýym - arý, áz meken!» taqyrybynda merekelik kontsert bolady. Al, 23.00-de otshashýmen aıaqtalady.
