Aqtaýdyń jańa ákimi alǵashqy jıynda tazalyqqa jaýaptylardy synǵa aldy
AQTAÝ. KAZINFORM – Aqtaý qalasynda turmystyq qatty qaldyqtardy shyǵarýmen 7 kompanııa aınalysady.
«Caspiy Operating» JShS, «Munaıly qyzmet» JShS, «SotsServıs-A» JShS, «Evro Servıs Djo» JShS, «Atameken-Tazalyq» JShS, «WRC» JShS, «Eko Kaspıı» JShS - bári turǵyndar shyǵarǵan turmystyq qatty qaldyqtardy polıgonǵa tasymaldaıdy. Al qalanyń sanıtarlyq tazalyǵyna «Aqjol+K» JShS jaýapty. Biraq, tazalyq jumystary júıeli júrgizilmeıdi. Sondyqtan ákim qala tazalyǵyn tez arada retke keltirýdi tapsyrdy.
- Tazalyq jumystarymen aınalysatyn barlyq kompanııa ár nysanǵa belgili bir mamandy bekitý qajet. Bul búgin tazartylyp, erteń umytylyp ketpeýi qajet. Qala tazalyǵy - bir ret jasalatyn aktsııa emes, udaıy nazarda ustaıtyn másele. Bul jumystardy qatań qadaǵalaý kerek. Qala tazalyǵyn tez arada retke keltirýdi tapsyramyn. Sonymen qatar, qaladaǵy jaǵymsyz ıiske baılanysty qalalyq sanıtarııalyq-epıdemıologııalyq basqarmasy ekologııa departamentimen birlesip máseleni sheshińizder, - dedi Aqtaý qalasynyń ákimi Ábilqaıyr Baıpaqov.
Jyl basynan beri qala aýmaǵynda zańsyz qoqys tastaǵan azamattarǵa qatysty Qazaqstan Respýblıkasy Ákimshilik quqyq buzýshylyq týraly Kodeksiniń 505-baby boıynsha, 2 myńǵa jýyq ákimshilik hattama toltyrylyp, 641 260 teńge mólsherinde aıyppul salynǵan. Jergilikti polıtsııa qyzmetiniń habarlaýynsha, onyń 530 500 teńgesi óndirildi.
Aqtaý qalasynyń ákimi Ábilqaıyr Baıpaqov quzyrly organǵa zańsyz qoqys tastaǵan azamattardy jaýapqa tartyp, ákimshilik shara qoldanýdy tapsyrdy.
