Aqtaýdyń bas sáýletshisine 900 myń teńgege jýyq aıyppul salyndy
AQTAÝ. KAZINFORM — Aqtaýda ruqsatsyz qoqys úıindisiniń anyqtalýyna baılanysty Mańǵystaý oblystyq qurylys, sáýlet jáne qala qurylysy basqarmasynyń basshysy Aıdos Hamıev ákimshilik jaýapkershilikke tartyldy.
Mańǵystaý oblystyq ekologııa departamentiniń málimetinshe, vedomstvoǵa Aqtaý qalasy aýmaǵynda qaldyqtardy zańsyz ornalastyrý deregi boıynsha Mamandandyrylǵan tabıǵat qorǵaý prokýratýrasynyń usynysy túsken. Tekserý barysynda jer telimi oblystyq qurylys, sáýlet jáne qala qurylysy basqarmasynyń balansynda ekeni anyqtalǵan.
-Osy derek boıynsha 2026 jyldyń 16 naýryzynda basqarma basshysyna qatysty Ákimshilik quqyqbuzýshylyq týraly kodekstiń 344-babynyń 2-1-bóligi boıynsha ákimshilik hattama toltyrylǵan. Іs materıaldary Ekologııa jáne tabıǵı resýrstar mınıstrliginiń Ekologııalyq retteý jáne baqylaý komıtetine joldanǵan. Keıin komıtet Aıdos Hamıevti ákimshilik jaýapkershilikke tartý týraly qaýly shyǵardy. Aıyppul kólemi 200 aılyq eseptik kórsetkishti qurap, 865 myń teńge bolyp belgilengen, - delingen habarlamada.
Alaıda oblystyq qurylys, sáýlet jáne qala qurylysy basqarmasynyń basshysy Aıdos Hamıev ekologtardyń qorytyndysymen tolyq kelispeıtinin aıtty. Qazirgi ýaqytta is shaǵymdaný satysynda, túpkilikti quqyqtyq baǵa áli berilmegen.
Onyń sózinshe, qalanyń sanıtarlyq tazalyǵyna jergilikti atqarýshy organdar men kommýnaldyq qyzmetter jaýapty.
-Aqtaý qalasynyń sanıtarlyq tazalyǵyn uıymdastyrýdy qala ákimdigi kommýnaldyq qyzmetter men merdiger uıymdar arqyly júzege asyrady. Bul jumys jergilikti basqarý týraly zańnama, Ekologııalyq kodeks jáne abattandyrý qaǵıdalary negizinde júrgiziledi. Al Mańǵystaý oblystyq qurylys, sáýlet jáne qala qurylysy basqarmasy Aqtaý ákimdiginiń quramyna kirmeıdi jáne qala aýmaǵyn sanıtarlyq tazalaýmen aınalysýǵa ókiletti emes, - deıdi oblystyń bas sáýletshisi.
Buǵan deıin, Mańǵystaýda ekologııalyq talaptardy buzǵan kompanııaǵa 474 mln teńge aıyppul salynǵan bolatyn
