Aqtaýdy jańbyr basty: kóshelerden 10 myń tekshe metr sý soryldy
ASTANA. KAZINFORM — Aqtaý qalasynda 7 qarashadan bastap tolassyz jaýǵan jaýyn saldarynan qala aýmaǵyndaǵy 11 núktede kóp mólsherde sý jınaldy. Osyǵan baılanysty kommýnaldyq qyzmet mamandary kúsheıtilgen rejımde jumys istep jatyr.
Sý sorý jumystaryna 20-ǵa jýyq arnaıy tehnıka men 50-ge jýyq jumysshy jumyldyryldy.
— Jumystarǵa kommýnaldyq memlekettik mekemelerdiń, Tótenshe jaǵdaılar departamentiniń, sondaı-aq merdiger kompanııanyń arnaıy tehnıkalary men jol jumysshylary tartyldy. Ýaqytsha qolaısyzdyqtarǵa túsinistikpen qaraýlaryńyzdy suraımyn, — dedi qala ákimi Maqsat Muqash.
Qala ákimdiginiń málimetinshe, jańbyr sýyn sorý jumystary túngi aýysymda da kúsheıtilgen rejımde úzdiksiz jalǵasady.
Kúndizgi jáne túngi aýysymdarda júrgizilgen jumystar nátıjesinde qala aýmaǵynan jalpy 10 myń tekshe metrge jýyq jańbyr sýy sorylyp shyǵaryldy.
Qazirgi ýaqytta qala aýmaǵyndaǵy jaǵdaı jaýapty sala mamandarynyń baqylaýynda. Jańbyr sýyn sorý jáne joldardy retke keltirý jumystary jalǵasady.
