Aqtaýdan Úrimshige jáne Astanadan Ystyqkólge tikeleı reıster ashyldy
ASTANA. KAZINFORM — Qazaqstan halyqaralyq marshrýttyq jelini keńeıtti. Osylaısha Qytaı men Qyrǵyzstanǵa jańa reıster ashylyp jatyr, dep habarlaıdy Kólik mınıstrliginiń baspasóz qyzmeti.
QR Kólik mınıstrligi ushý baǵyttarynyń geografııasyn keńeıtý jáne halyqaralyq reıster sanyn arttyrý boıynsha júıeli jumys júrgizip keledi.
Osy jumys aıasynda qazaqstandyq FlyArystan áýe kompanııasy Qytaı men Qyrǵyzstan baǵyttary boıynsha jańa halyqaralyq reısterdi iske qosty.
Bıylǵy jyldyń 26 maýsymynan bastap áýe kompanııa Aqtaý — Úrimshi (Qytaı) baǵyty boıynsha turaqty reısterdi oryndaı bastady. Reıster aptasyna eki ret — seısenbi jáne juma kúnderi Airbus A320 úlgisindegi áýe kemelerimen júzege asyrylady.
Sonymen qatar, 3 shildeden bastap Astana — Ystyqkól (Qyrǵyzstan) baǵyty boıynsha jańa turaqty reıster iske qosyldy. Reıster aptasyna eki ret — dúısenbi jáne juma kúnderi Airbus A320 úlgisindegi áýe kemelerimen oryndalatyn bolady.
— Jańa halyqaralyq áýe baǵyttarynyń ashylýy Qazaqstannyń Qytaı jáne Qyrǵyzstanmen saýda-ekonomıkalyq, iskerlik, týrıstik jáne gýmanıtarlyq baılanystaryn odan ári nyǵaıtýǵa, sondaı-aq jolaýshylar úshin halyqaralyq saparlar múmkindigin keńeıtýge yqpal etedi, — delingen mınıstrlik taratqan aqparatta.
Osyǵan deıin Emirates áýe kompanııasy Almaty men Dýbaı arasynda júk reısterin iske qosqanyn jazǵan edik.
