Aqtaýdan tabylǵan Sımba atty arystan búgin Almatyǵa jetkiziledi

ALMATY. QazAqparat – Aqtaýda tabylǵan arystan ushaqpen Almatyǵa jetkiziletin boldy. Bul týraly Orman sharýashylyǵy men janýarlar álemi komıtetiniń baspasóz hatshysy Sáken Dildahmet málimdedi, dep habarlaıdy QazAqparat tilshisi.

Onyń aıtýynsha, Mańǵystaý oblysy orman sharýashylyǵy men janýarlar álemi aýmaqtyq ınspektsııasynyń qyzmetkerleri men Almaty zoobaǵynyń veterınarlary Aqtaýdaǵy áýejaıǵa bet alǵan.

«Sımba Almatyǵa búgin jetkiziledi. Odan ary zoobaqqa beriledi. Jyrtqysh qazir arnaıy jáshikte qamaýly. Ony jetkizýdi «Ohotzooprom» RMKK moınyna alǵan. Ortalyq mamandary janýarǵa osyndaı yńǵaıly jáshik jasady. Buıyrsa, keshke deıin arystan Almatyda bolady», - dep jazdy Facebook paraqshasynda Sáken Dildahmet.

Onyń aıtýynsha, Almatyda ań patshasyn Almaty oblystyq orman sharýashlyǵy jáne janýarlar álemi ınspektsııasynyń jabaıy janýarlardy qonystandyrý ortalyǵynyń mamandary kútip alady.

Búgin tańerteń Sımbaǵa anestezııalyq ekpe salynatyny jazylǵan bolatyn. Jyrtqysh áýe jolymen tasymaldaǵanda mazasy ketpes úshin arnaıy dárimen uıyqtatylady.

Aıta ketý kerek, 25 maýsymda Mańǵystaý oblysynyń Aqshuqyr aýylynyń jergilikti turǵyndary kóshede júrgen arystandy kórip, dabyl qaqqan bolatyn. Jyrtqysh janýardy mamandar ustap, tsırkke tabystady.

Keıin Orman sharýashylyǵy jáne janýarlar álemi baspasóz hatshysy Sáken Dildahmet arystannyń taǵdyry týraly aıtyp berdi.

10 shildede jyrtqysh janýardy zańsyz baǵyp alǵan Aqtaý turǵynyna qatysty sot úkimi shyqty.