Aqtaýdan Erevanǵa tikeleı reıster 16 jeltoqsannan bastap qaıta jandanady
ASTANA. KAZINFORM — FlyArystan áýekompanııasy halyqaralyq baǵyttar jelisin keńeıtip, Aqtaý — Erevan — Aqtaý baǵyty boıynsha tikeleı áýe qatynasyn qaıta iske qosady. Reıster 2026 jylǵy 16 jeltoqsannan bastap aptasyna eki ret — sársenbi jáne juma kúnderi oryndalady.
Sársenbi kúnderi reıs Aqtaýdan saǵat 12:35–te ushyp, Erevanǵa 13:20–da qonady. Keri reıs Erevannan 14:20–da ushyp, Aqtaýǵa 17:00–de keledi. Juma kúnderi reıs Aqtaýdan 09:00–de ushyp, Erevanǵa 09:40–ta qonady. Keri reıs Erevannan 10:40–ta ushyp, Aqtaýǵa 13:15–te keledi. Ýaqyt jergilikti ýaqytpen kórsetilgen.
— Erevan — Armenııanyń astanasy, ári tarıhy 2 800 jyldan asatyn álemdegi eń kóne qalalardyń biri. Qalanyń basty nyshandarynyń biri — Erevan men Ararat taýynyń panoramalyq kórinisi ashylatyn Kaskad kesheni. Al Respýblıka alańy elorda turǵyndary men qonaqtary jıi baratyn negizgi oryndardyń biri bolyp sanalady. Erevannyń ornalasýy saıahatshylarǵa elordadan tys jerlerge saparyn ońaı jalǵastyrýǵa múmkindik beredi. Qaladan qysqa ýaqytta jetýge bolatyn Garnı ǵıbadathanasy, Gegard monastyry jáne Sevan kóli sııaqty tanymal oryndar qalalyq demalysty eldiń tarıhı jáne tabıǵı kórikti jerlerine saıahatpen úılestirýge múmkindik beredi, — delingen habarlamada.
Aqtaý — Erevan — Aqtaý reısterine áýebıletteriniń quny bir baǵytqa 41 000 teńgeden bastalady.
Eske salaıyq, buǵan deıin Qazaqstan men Saýd Arabııasy arasyndaǵy áýe reısi 28-den 70-ke kóbeıgenin jazǵan edik.
