Aqtaýdaǵy jarylystyń aldyn ala sebebi ataldy

AQTAÝ. QazAqparat - Mańǵystaý oblysy Tótenshe jaǵdaılar departamenti bastyǵynyń orynbasary Bekbolat Ábdiqadyrov jarylystyń aldyn ala sebebin aıtty. Bul týraly QazAqparat atalmysh departamentke silteme jasap habarlaıdy.

Túngi saǵat 9:25-te Mańǵystaý oblysy Tótenshe jaǵdaılar departamentiniń Daǵdarys jaǵdaılardy basqarý basqarmasyna Aqtaý qalasynyń 29-shy shaǵyn aýdanyndaǵy «Sherqala» eki qabatty kesheniniń aýmaǵynda jarylys bolǵany týraly telefon habarlamasy kelip tústi.

Jarylys bolǵan jerde jedel shtab quryldy. Oblys ákimi, azamattyq qorǵaý qyzmetiniń basshysy, Aqtaý qalasy ákimdigi oqys oqıǵa bolǵan jerde júr. Avarııalyq-qutqarý jumystaryna 70 adam, 11 tehnıka, tótenshe jaǵdaılardy joıýdyń kúshteri men quraldary jumyldyryldy. Sondaı-aq 150 polıtsııa qyzmetkeri, 20 tehnıka, azamattyq qorǵaý ınjenerlik qyzmeti jáne energetıka qyzmetteri tartyldy. Kınologııalyq qyzmettiń barlaýy boıynsha, jarylys ornynda zardap shekkender joq ekeni anyqtaldy. Muny «Sherqala» kesheni ıesiniń barlyq jumysshylardyń jumys kúni aıaqtalyp, keshki saǵat 18-20 shamasynda ǵımarattan shyǵyp ketkeni týraly sózi de rastaıdy.

Jarylystyń aldyn ala sebebi gaz-aýa qospasynyń aǵýynan bolýy múmkin. Qazirdiń ózinde oqıǵa ornynan eki gaz ballony shyǵaryldy.

Atalmysh keshen aıtýynsha, úıindilerdiń astynda taǵy eki gaz ballony bar. Olardyń árqaısysynyń syıymdylyǵy 50 lıtr. Tolyǵyraq aqparat oqshaýlaý jáne joıýdan keıin beriledi.

Budan buryn habarlanǵandaı, Aqtaýda jarylys boldy. Áleýmettik jelilerde jarylystyń fotolary men vıdeolary paıda boldy.