Aqtaýdaǵy jańa mektepte 17 birinshi synyp ashyldy
1200 oryndyq bilim ordasynda 17 birinshi synyp ashyldy.
Aımaq basshysy Serikbaı Trumov jańa mekteptiń ustazdary men ata-analaryn jáne oqýshylardy aıtýly kúnmen quttyqtap, tabys tiledi.
«Búgin jarqyn da qýanyshty mereke – Bilim kúninde barlyq talapqa saı jańa mektep ózderińizge esigin aıqara ashyp jatyr. Dál osy kúnnen bastap, alǵashqy qońyraý únimen birge, ár adam ómiriniń jeke tulǵa jáne azamat retinde qalyptasý kezeńi bastalady. Bıylǵy oqý jyly barlyq sanıtarlyq talaptardy saqtaı otyryp, dástúrli formatta bastalady. Bizdiń mindetimiz - sońǵy eki oqý jylyndaǵy oqý-tárbıe protsesindegi kemshin tustaryn toltyrý, oqýshylarǵa qolaıly jaǵdaı jasaý, balalar qaýipsizdigin qamtamasyz etý», - dedi oblys ákimi.
Saltanatty jıynda birinshi synyptyń oqýshylaryna oblys ákimi «Álippe» oqýlyǵyn tabystady. 2-11 synyp oqýshylaryna Qazaqstan Respýblıkasy Táýelsizdiginiń 30 jyldyǵyna oraı «Táýelsizdik jetistikteri» atty synyp saǵattar uıymdastyryldy. Synyp saǵattary ár synyp úshin jeke kabınetterde sanıtarlyq talaptardy saqtaı otyryp ótkizildi.
Jańa mektepte mýltımedııalyq oqý zaldary, zamanaýı jabdyqtalǵan fızıka, hımııa, bıologııa, ınformatıka, mýltımedııalyq kabınetter, ınterbelsendi taqtalarymen jabdyqtalǵan, tehnologııa kabınetteri jabdyqtalǵan. Sondaı-aq, mektep aýmaǵynda halyqaralyq standartqa saı sporttyq oıyn alańdary, júgirý joldary jáne demalýǵa arnalǵan oryndar ornalasqan. Ǵımaratqa beınebaqylaý júıesi, dabyl túımesi ornatylyp, ınternet jelisi tartylǵan.
Atalǵan mektepke ustazdar quramy erekshe tásilmen qabyldandy. Qoǵam belsendilerinen arnaıy komıssııa qurylyp, muǵalimderdiń úzdikteri túrli suraqqa jaýap berý arqyly tańdap alyndy. Saıdyń tasyndaı iriktelgen 160 pedagog jańa mektepte shákirt tárbıeleıtin bolady.
Búgin oblys kóleminde 2 memlekettik, 5 jekemenshik mektep ashylyp, paıdalanýǵa berildi. Al, aldaǵy 5 jylda taǵy da jańa otyzǵa jýyq mekteptiń qurylysyn salý josparlanýda.