Aqtaýdaǵy oqıǵa: Sábı kútýshisiniń úıinde kóz jumǵan

AQTAÝ. QazAqparat - Aqtaýda 1 jasar bala jeke balabaqshada qaıtys boldy degen aqparat áleýmettik jelide taralyp ketken bolatyn. Mańǵystaý oblystyq Polıtsııa departamenti bergen málimet qate. Qaıǵyly jaǵdaı 3 bólmeli jeke páterde bolǵan. Bul týraly qalalyq ákimdiktiń baspasóz ókilderi jarııa etti, dep habarlaıdy QazAqparat tilshisi.

Qalalyq ákimdiktiń baspasóz ókilderiniń aıtýynsha, bir jasar sábı jeke bala kútýshiniń úıinde 27-inshi shaǵynaýdanda, 6 jeltoqsan kúni túski mezgilde kóz jumǵan.

«Oqıǵa tirkelgen 27-21-4 mekenjaıynda kóp balaly ana turady. Ol jeke balabaqsha retinde esh jerde tirkelmegen. Ata-analardyń suraýy boıynsha aqyǵa balalaryn baǵyp bergen»,-delingen habarlamada.

Bala óliminiń sebebi ázirge belgisiz. Aldyn ala boljam boıynsha náreste allergııalyq aýrýdan shetinegen. Qazir mamandar tekserý jumystaryn júrgizýde. Oryn alǵan qaıǵyly oqıǵa boıynsha qylmystyq is qozǵaldy.

«103-ke shaqyrtý qońyraýy túsken soń, brıgada saǵat 14:11-de atalǵan mekenjaıǵa bardy. Sol kúni jeke kútýshi balany óz qaraýyna eń alǵash ret alǵan. Sábıdiń denesinde uryp-soǵý belgileri bolmady. Osyǵan deıin medıtsınalyq esepte turmaǵan. Náresteniń neden qaıtys bolǵandyǵyn arnaıy quzyrly organ qyzmetkerleri anyqtaıtyn bolady»,-dep habarlady oblystyq Densaýlyq saqtaý basqarmasynyń ókilderi.