Aqtaýdaǵy MMA týrnırin 15 myńnan astam kórermen tamashalady
Mańǵystaý oblysy ákimi baspasóz qyzmetiniń málimetinshe, ashyq aspan astynda ótken týrnırge 15 myńnan astam kórermen jınaldy. Týrnırge Mańǵystaý oblysynyń basshysy Nurlan Noǵaev, UFC chempıony Habıb Nurmaǵamedov, UFC jaýyngeri Shavhat Rahmonov qatysty.
«Qazaqstan prezıdenti Qasym-Jomart Toqaevtyń tapsyrmasy boıynsha memlekettik organdar jastar men jasóspirimder arasynda buqaralyq sport túrlerin damytý, sportpen aınalysatyn azamattar sanyn arttyrý boıynsha turaqty júıeli jumys júrgizýde. Bizdiń elimizdiń namysyn qorǵaıtyn jáne kóptegen jas býynǵa úlgi bolatyn barlyq uıymdastyrýshylarǵa, qatysýshylar men jaýyngerlerge alǵys bildirgim keledi. Bul týrnırdi Aqtaýda ótkizý Habıb Nurmaǵamedovtiń ákesi, marqum Abdýlmanap Nurmaǵamedovtiń ıdeıasy edi. Ókinishke oraı ol qazir bizdiń aramyzda joq, biraq izbasarlary onyń isin jalǵastyrýda», - dep atap ótti Nurlan Noǵaev týrnırdiń ashylýynda.
Týrnırge álemniń jeti elinen 32 sportshy qatysyp, 16 jekpe-jek ótkizdi.
«Naiza» jáne «EAGLE FC» birlesken týrnıriniń basty jekpe-jeginde qazaqstandyq sportshy Dáýren Ermekov pen reseılik Gamzat Hıramagomedov «EAGLE FC» beldigi úshin kezdesý ótkizdi. Ekinshi raýndta tehnıkalyq nokaýtpen qazaqstandyq sportshy jeńiske jetti. Sonymen qatar otandasymyz Meıirbek Tólegenov (3-1) ázerbaıjandyq Djeıhýn Godjalıdi birinshi raýndta aýyrtý ádisimen jeńdi.
Taǵy bir otandasymyz Bolat Zamanbekov (3-1) qyrǵyzstandyq Syımyk Eldııarýýlynan jekpe-jektiń ekinshi raýndynda býyndyrý ádisimen basym tústi.
«Mańǵystaý oblysynyń barlyq turǵyndaryna sálem joldaımyn. Týrnırdi tamashalaýǵa kelgen myńdaǵan adamnyń arasynda bolǵanyma óte qýanyshtymyn. Dál qazir sizderdiń aralaryńyzda týrnırden keıin osy sport túrine qyzyǵýshylyqpen keletin jáne óz kúsh-jigeriniń arqasynda aldaǵy 10 jyldan keıin aty ańyzǵa aınalatyn jastar shyǵady dep esepteımin. Mundaı jarystardy jıi ótkizip, jastarymyzdy sportqa baýlý kerek. Qazaqstan - meniń týǵan jerim, munda úlken Daǵystan dıasporasy bar. Mańǵystaýlyqtardyń qonaqjaılyǵy úshin alǵysymdy bildiremin»,- dedi óz sózinde álem chempıony Habıb Nurmaǵamedov.
