Aqtaýdaǵy kóshe shamdary kún qýatymen jumys isteıtin bolady
ASTANA. QazAqparat - Mańǵystaý oblysynyń ákimdigi, «Source Energy» JShS jáne QHR «Huaming Guangdong smartled co LTD» kompanııasy arasynda ózara yntymaqtastyq týraly úshjaqty memorandýmǵa qol qoıyldy, dep habarlaıdy oblys ákiminiń baspasóz qyzmeti.
Áriptestik aıasynda Qytaı kompanııasy Aqtaý qalasynyń kóshelerindegi jaryq jelilerin kún sáýleleri arqyly jumys jasaıtyn jaryqtandyrýdyń jańa úlgisine aýystyrady.
«Astana-EKSPO-2017» halyqaralyq kórmesine daıyndyq aıasynda Aqtaý qalasyndaǵy kóshe jaryqtary jasyl ekonomıka negizinde jumys jasaıtyn jaryqtandyrý úlgisine ótedi. Bul Qytaı kompanııasynyń uzaqmerzimdi ınvestıtsııalyq jobasy. Joba Mańǵystaý oblysynyń barlyq aýmaǵyn qamtýdy josparlap otyr», - dep atap ótti Mańǵystaý oblysynyń ákimi Eraly Toǵjanov.
Jobany iske asyrýdyń josparyn jasaqtaý úshin úshjaqty jumys toby qurylady. Energııany únemdeıtin qurylǵyny ornatý, ony iske qosý, retteý jumystarynyń barlyǵy memlekettik-jeke-menshik áriptestik aıasynda uıymdastyrylady.
«Joba Aqtaý qalasynan bastalatyn bolady. Munda búginde natrıli jaryq qoldanylady. Onyń barlyǵy zamanaýı jaryqdıodty shamdarǵa aýystyrylady. Jańa qurylǵynyń ornatylýymen qala energııa kózin 70%-ǵa deıin únemdeı alady. Osy arqyly ınvestor óz qarajatyn qaıtarady», - dep habarlady «Source Energy» JShS baqylaý keńesiniń tóraǵasy Oralbek Botbaı.
Sodan keıin ózara yntymaqtastyq týraly dál osyndaı memorandým Aqtaý qalasynyń ákimdigi, «Source Energy» JShS jáne QHR «Huaming Guangdong smartled co LTD» kompanııasy arasynda jasaldy.
