Aqtaýdaǵy qoǵamdyq kólikterge saralanǵan jolaqy qunyn engizý josparlanyp otyr

AQTAÝ. QazAqparat - Keler jyldan bastap, qala avtobýstarynda saralanǵan jolaqy qunyn (dıfferentsırovannyı tarıf) engizý josparlanyp otyr, dep habarlaıdy QazAqparat tilshisi.

Qoǵamdyq kommýnıkatsııa ortalyǵynda ótken brıfıngide qala ákimi Nurdáýlet Qılybaı jolaýshylar elektrondyq karta arqyly (valıdator) jolaqy tarıfin tólegen jaǵdaıda 70 teńge bolatynyn, al qolma-qol tólegen jaǵdaıda eki eselengen 140 teńge tóleýge mindetti ekenin aıtty.

«Bul saralanǵan jolaqy quny qazirgi tańda respýblıkanyń kóptegen óńirde qoldanylyp jatyr. Saralanǵan tarıftiń artyqshylyǵy bul arqyly biz tasymaldaýshy mekemelerdiń naqty jolaýshy aınalymyn bilip otyramyz, sol arqyly olarǵa qarjylaı sýbsıdııa tóleımiz jáne jolaýshylardyń jolaqy tóleýdiń elektrondyq júıesine tez daǵdylanýyna septigin tıgzetin bolady», - dedi N.Qılybaı.

Sondaı-aq, Aqtaýda jańa aýdandar arasyna qatynaıtyn birneshe qoǵamdyq kólik júre bastaıdy.

Aqtaý qalasynyń soltústik batys baǵytqa qaraı ósip, jańa shaǵynaýdandar boı kóterýine baılanysty jańa marshrýt ashý josparlanyp otyr. Osy maqsatta jańa baǵyttaǵy №1 jáne №8 qoǵamdyq kólikterine konkýrs jarııalandy. Konkýrs boıynsha tasymaldaýshy mekemeler qatysyp, jeńimpaz anyqtalyp jatsa, atalǵan jańa baǵyttaǵy qoǵamdyq kólikter jeltoqsan aıynan bastap iske qosylady.

«№1 avtobýs qalanyń «Shyǵys-1,2,3» shaǵynaýdandaryn qamtıdy. Al, №8 qoǵamdyq kóligi qalanyń 20 shaǵynaýdanyn bastap 17, 18, 18a shaǵynaýdandary arqyly qalanyń ortalyq baǵytyna qaraı qatynaıdy. Jalpy, Aqtaý qalasy boıynsha jolaýshylardy turaqty tasymaldaýmen 6 baǵytta qoǵamdyq kólik qyzmet atqarady. Olar № 2, 3, 4, 4M, 5, 7 barlyq avtobýs sany 70 dana. Tasymaldaýmen aınalysatyn 3 mekeme bar olar, «Aına» JShS, «Jolaýshy-Aqtaý» JShS» jáne jeke kásipker «Sh.Bekbaýlov», - dedi N.Qılybaı.

Esterińizge sala keteıik, buǵan deıin Aqtaýda tozyǵy etken qoǵamdyq kólikter jańartylǵanyn jazǵan bolatynbyz. Búginde qalalyq qoǵamdyq kólikterdiń 70%-dan kóbi jańartýdy qajet etedi.

Sondaı-aq, Aqtaýda túnde qoǵamdyq kólikter qyzmetin qosýdy josparlap otyr.

«Bolashaqta saǵat túngi 2, 3- ke deıin júretin avtobýstardy shyǵarǵymyz keledi. Josparlarymyz kóp, kúni erteń 20-shaǵyn aýdannan bastap shyǵatyn jańa 8-marshrýt shyǵaraıyn dep otyrmyz. Bul – sol aýdannyń turǵyndary kópten beri kótergen másele», - dedi Nurdáýlet Qılybaı.