Aqtaýdaǵy gaz tapshylyǵy problemasy sheshimin tapty
AQTAÝ. QazAqparat - Sońǵy kúnderi Aqtaýdaǵy suıytylǵan gazdy satyp alý oryndarynda otynnyń jetispeýshiligine baılanysty, kezekke turýshylar qarasy kóbeıip, onyń arty daýǵa ulasyp jatty. Qalada suıyq gaz jetispeýshiligi problemasy QazGÓZ jóndeýden ótip, tolyq iske qosylǵannan keıin óz sheshimin tapty, dep habarlaıdy «QazAqparat» HAA tilshisi.
Budan basqa, jergilikti bılik qosymsha Aqtóbe oblysynan 2 myń tonna gaz ákelýdi sheshti. Alǵashqy 600 tonna gaz quıylǵan 18 vagon jolda kele jatyr. Qazir vagondar Mańǵystaý oblysynyń Beıneý stansasynda, erteń tańerteń 10-da Mańǵyshlaq stansasyna keledi. 20 mamyrda tańerteńgi saǵat 9-da tizim boıynsha kásipkerlerge gaz taratylady.
«Oblysta gaz stantsııasynyń joq ekendigin aıtqym keledi. Óńirde gaz satý jumystarymen aınalysatyn uıymnyń QR Energetıka mınıstrliginen berilgen lıtsenzııasy bolýy shart. Aqtóbe oblysy aýmaǵynda osyndaı qyzmetti júzege asyratyn uıym anyqtaldy», - dep atap ótti Mańǵystaý oblysynyń kásipkerlik jáne saýda basqarmasynyń basshysy Venera Mustapaeva.
«1 tonna gazdyń kóterme baǵasy 28 myń teńgeni quraıdy, onyń baǵasyn QR Energetıka mınıstrligi belgileıdi», - dedi V. Mustapaeva.
