Aqtaýdaǵy eń bıik týdyń túbinde «Kók týdyń jelbiregeni» áni shyrqaldy

AQTAÝ. QazAqparat - Búgin Aqtaý jastary Memlekettik rámizder alańyndaǵy týtuǵyrdyń túbinde «Kók týdyń jelbiregeni» ánin avtormen birge shyrqady, dep habarlaıdy QazAqparat Mańǵystaý oblysy ákimdigine qarasty qoǵamdyq kommýnıkatsııa ortalyǵyne silteme jasap.

Aqtaýda ótken ulttyq patrıottyq sharasy el Táýelsizdiginiń 30 jyldyǵy aıasynda uıymdastyryldy.

Otansúıgishtik rýhtaǵy kezdesýge belgili aqyn, mádenıet qaıratkeri «Kóktýdyń jelbiregeni» atty óleńniń avtory Almas Ahmetbekuly, arnaýly oqý oryndarynyń stýdentteri, áskerı qyzmetkerler men zııaly qaýym ókilderi qatysty.

Kezdesý barysynda Almas Ahmetbekuly patrıottyq jalyndy jyrlaryn oqyp, jastardy týǵan jerdi súıýge, Otanǵa adal qyzmet etýge shaqyrdy.

«Azattyqtan úlken baılyq joq. Bizdiń keler urpaǵymyzǵa qazaqtyń myna baıtaq jeri baqyt pen baılyqtyń mekeni bolý kerek. Táýelsizdigimizdi baıandy etetin, týymyzdy kókke kóterip, elimizdiń ósip-órkendeýine úles qosatyn jastar legin tárbıelep shyǵarýymyz kerek. Sebebi bolashaq – jastardyń qolynda», - dedi aqyn Almas Ahmetbekuly.

Aqynnyń «Marqakólden Mańǵystaýǵa» atty shyǵarmashylyq sapary aıasynda oblystaǵy Esenov ýnıversıtetiniń stýdentterimen jáne óńirdegi munaıshylarmen kezdesý keshi ótkiziledi.