Aqtaýdaǵy borly taýǵa atyn oıyp jazǵan mádenıet úıiniń dırektory jazalana ma
Aqtaýlyq Azamat Sársenbaev óz paraqshasyna borly taýǵa oıyp jazyp, tabıǵatqa zııanyn tıgizgen adamdy taýyp, jazalaýdy surady. Beınematerıaldan er adamnyń balǵa men úshkir zat arqyly aq borly taýǵa qashap jazyp turǵanyn anyq kórýge bolady. Jeli qoldanýshylar onyń rýyn, «Aqkete» dep jazyp jatqanyn aıtady. Ári onyń kóliginiń nómiri de jazýly tur.
Aqtóbe qalalyq mádenıet jáne tilderdi damytý bóliminiń habarlaýynsha, beınematerıalda kórsetilgen adam bıýdjettik mekeme basshysy.
«Qazirgi tańda eńbek demalysynda. Jumysqa shyqqan soń túsindirý jumystary júrgizilip, tıisti sharalar qoldanylady»,- dep jazdy Aqtóbe qalalyq mádenıet jáne tilderdi damytý bólimi.
Mańǵystaý oblystyq polıtsııa departamenti bolsa borly taýǵa qashap jazǵan aqtóbeliktiń kim ekenin anyqtap, ákimshilik hattama toltyrmaq. Al Aqtóbe oblystyq mádenıet, arhıvter jáne qujattama basqarmasynyń basshysy Altynaı ıÝnısova vıdeodaǵy adamnyń ánshi, mádenıet úıiniń dırektory Manas Kósherbaev ekenin rastady.
«Ol qalalyq mádenıet jáne tilderdi damytý bólimine qarasty zaǵıptar mádenıet úıiniń dırektory Manas Kósherbaev. Ózge aqparatty qalalyq mádenıet bóliminen surańyz»,- dedi Altynaı ıÝnısova.
Aıta keteıik, aǵaıyndy Kósherbaevtar aqtóbelikterge jaqsy tanys. Olardyń prodıýserlik ortalyǵy bar. Ekeýi de án aıtady. Dırektorlyq qyzmetke byltyr kúzde taǵaıyndalǵan. QazAqparat tilshisi mádenıet úıiniń dırektoryna qońyraý shalǵanymen, baılanysý múmkin bolmady.