Aqtaýdaǵy balabaqsha dırektory balalarǵa durys tamaq bermegeni úshin aıyppul tóleıdi

AQTAÝ. QazAqparat - Aqtaýda sot balalardy durys tamaqtandyrmaǵan «Aınalaıyn» jekemenshik balabaqshasynyń dırektoryn jaýapqa tartty. Bul týraly búgin lada.kz saıty jazdy, dep habarlaıdy QazAqparat.

Balabaqsha tárbıelenýshileriniń ata-anasy - jalpy 22 adam kásipkerdi jaýapqa tartýdy talap etip sotqa júgingen. Aqtaý qalalyq №2 soty isti tekserip shyqqan soń, olardyń talabyn ishinara qanaǵattandyrdy. Sottyń úkimimen kásipker ár balanyń ata-anasyna moraldyq zalaldyń ornyn toltyrý úshin 10 446 teńgeden aıyppul tóleıtin boldy.

Ata-analardyń shaǵymdanýyna qaraǵanda, balabaqshada durys tamaqtanbaǵandyqtan, balalardyń qarny toımaı, jıi aýyra bastaǵan.

«Ata-analar bultartpas naqty dálelder keltirgen joq. Ákimdikten tekseris júrgizilmegen, prokýratýra nemese sanepıdemstantsııadan rastama alynǵan joq. Ata-analardyń aıtýynsha, balabaqshada sońǵy aptada aspaz almasqan soń balalardyń qarny toımaıtyn bolǵan. Biz osy dáleldi eskerdik», - dep málimdedi Aqtaý №2 sotynyń sýdıasy Aqsaıa Eńsebaeva.

Ata-analardyń aıtýynsha, balabaqsha jabylyp qalǵandyqtan tekseris júrgizilmegen.

Eske sala keteıik, «Aınalaıyn» balabaqshasynda dırektor men tárbıeshi tóbelesip, soǵan baılanysty jabylǵan bolatyn.

Tárbıeshini soqqyǵa jyqqan dırektorǵa sot aıyppul salǵan.