Aqtaýdaǵy aýrýhanada eki jasar balaǵa merzimi ótken preparat salynǵan
Qańtar aıynan beri dárigerler Rýfına esimdi búldirshinniń qyzýy ne sebepti 38 gradýsqa deıin kóterilip, aıaq-qoly tyrysyp qalatynyn anyqtaı almaǵan. Búldirshin qyrkúıek aıynda aýrýhanaǵa úshinshi márte túsip, jeke zerthananyń arnaıy mamandaryn shaqyrǵan kezde ǵana tsıtamegalovırýs dıagnozy qoıylǵan. Bul aýrýǵa qarsy preparat tıisti nusqaýlardy qatań saqtaýdy talap etedi. Naýqas balanyń anasynyń aıtýynsha, dárini ýaqytynda qoldanbasa, jaramsyz bolyp qalady.
«Bul preparat 24 saǵatqa jaramdy. Bala bir táýlik ishinde 2 ret qabyldaýy tıis. Saǵat 2-de ashyldy, ıaǵnı túngi saǵat 2-de berilý kerek, kelesi kúni qoldanbaý kerek. Olar úshinshi kúni preparatty qaıta paıdalandy. Al jaramdylyq merzimi ótip ketti», - dedi Aqtaý qalasynyń turǵyny Juldyz Tadjenova.
Onyń aıtýynsha, jaramsyz preparatty salǵannan keıin qyzynyń jaǵdaıy kúrt nasharlaǵan. Kúnine balanyń dene temperatýrasy birneshe ret 39 gradýsqa deıin kóterilgen. Aýrýhana qyzmetkerleri oryn alǵan jaǵdaıdy rastady. Qyzmetkerlerdiń biri óz kinásin moıyndady.
Oblystyq densaýlyq saqtaý basqarmasy medıtsınalyq qyzmetkerden keshirim hatyn qabyldap, oǵan sógis jarııalady.
«Ázirge tek sógis jarııalaımyz. Óıtkeni medbıkeniń qyzmetinde mundaı jaǵdaı alǵash ret bolyp otyr. Qazir medbıke óz kinásin moıyndap, balanyń ákesinen keshirim surady. Mundaı tsıtamegalovırýstyq ınfektsııa kezinde temperatýra bolýy qalypty», - dep túsindirdi Mańǵystaý balalar aýrýhanasy dırektorynyń orynbasary Gúljan Ermekbaeva.
Alaıda, zardap shekken qyzdyń anasy sógis túrindegi jazaǵa qanaǵattanbaıdy. Ol medıtsına qyzmetkerin jumystan shyǵaryp, balaǵa sapaly medıtsınalyq kómek kórsetý úshin elordadaǵy Ana men bala ulttyq ortalyǵyna kvota alýdy kózdep otyr.