Aqtaýdaǵy atys: Oq tıip jaralanǵan azamat esin jımastan kóz jumdy

AQTAÝ. QazAqparat - Aqtaýdaǵy 5-shaǵynaýdanda ornalasqan №21 úıdiń artynda atys boldy. Oqıǵa kezinde oq tıip jaralanǵan er adam kóz jumdy, dep habarlaıdy QazAqparat Lada.kz resýrsyna silteme jasap.

Mańǵystaý oblystyq polıtsııa departamentiniń málimetinshe, atys bolyp jatqany týraly aqparat polıtsııa kezekshi bólimine keshe keshki saǵat 19:55 shamasynda túsken.

Oqıǵa ornyna jedel tergeý toby kelip jetti.

Jaraqat alǵan azamat Mańǵystaý oblystyq aýrýhanasyna jetkizilgen. Alaıda ol esin jımastan qaıtys boldy.

Polıtsııa qyzmetkerleri kúdiktini ustap, ýaqytsha ızolıatorǵa qamady.

«Atalǵan fakti QR Qylmystyq kodeksiniń 99-baby boıynsha tirkelgen. Sot-medıtsınalyq saraptama taǵaıyndaldy. Sotqa deıingi tergeý jumystary júrip jatyr « dep málim etti departamenttiń baspasóz qyzmeti.

Eske sala keteıik, keshe keshkisin 5-shaǵynaýdan turǵyndary áleýmettik jelide aýlada atys bolyp jatqanyn habarlaǵan bolatyn.