Aqtaýdaǵy asylyp qalǵan sarbaz dárigerler kelip jetkenshe kóz jumǵan

AQTAÝ. QazAqparat - Brıgada quramynda bolǵan dáriger men feldsher oqıǵa ornyna 10 mınýtta jetken, dep habarlaıdy QazAqparat tilshisi.

Aıta ketý kerek, jedel járdem qyzmeti oqıǵa ornyna jetpeı turyp jigit jantásilim etken.

«Múmkin bireýler onyń sýıtsıd jasaǵanyn kórgende nemese erterek habarlaǵanda, ony aman alyp qalýǵa bolar ma edi»,-dep pikir bildirdi QazAqparat tilshisine Mańǵystaý oblystyq densaýlyq saqtaý basqarmasynyń baspasóz qyzmeti.

«2019 jyldyń 31 jeltoqsanynan 2020 jyldyń 1 qańtaryna qaraǵan túni tańǵy 04:13 kezinde Mańǵystaý oblysynyń jedel medıtsınalyq járdem stantsııasynyń «103» qyzmetine jas jigittiń ózine qol jumsaǵany týraly shaqyrtý túsken. Jedel járdem brıgadasy oqıǵa ornyna 10 mınýtta jetken bolatyn. Belgili bolǵandaı, sýıtsıd jasaǵan 18 jastaǵy áskerı boryshyn ótep jatqan matros bolyp shyqty. Jas jigit - Túrkistan oblysynyń týmasy»,-dedi basqarmanyń baspasóz hatshysy Nurbol Okýov.

Eske sala keteıik, Mańǵystaýda áskerı boryshyn ótep júrgen sarbaz ózine qol jumsaǵan bolatyn. Іshki ister mınıstrligi Aqtaýdaǵy teńizshi-sarbazdyń ólimin tekseretin boldy.

«Sot saraptamalary taǵaıyndaldy. Eń aldymen máıitke sot-medıtsınalyq saraptama júrgiziledi. Odan bólek, ólimnen keıingi sot-psıhıatrııalyq saraptama bekitilgen», - dep jaýap berdi QR ІІM Tergeý departamentiniń basshysy Sanjar Ádilov Ortalyq kommýnıkatsııalar qyzmetinde tilshiler suraǵyna.

Sonymen birge, departament basshysy álimjettik bolǵan-bolmaǵanyn da tekseretinin aıtty.