Aqtaýdaǵy «Ardager» saýda ortalyǵyn tonaǵandardyń árqaısysy 5 jylǵa sottaldy
ASTANA. QazAqparat - Aqtaý qalalyq sotynda Qazaqstan Respýblıkasy Qylmystyq Kodeksiniń 188-babynyń 4 bóliginiń 3 tarmaǵymen D. men J.-ǵa qatysty qylmystyq is boıynsha sot úkimi jarııalandy, dep habarlaıdy mng.sud.kz .
Sotta anyqtalǵandaı, sottalýshylar 2017 jyldyń tamyz aıynyń 12-sinen 13-ine qaraǵan túni saǵat 02:30 shamasynda Aqtaý qalasy 9 shaǵynaýdandaǵy «Ardager» saýda ortalyǵyndaǵy sulýlyq salonyn, zergerlik buıym satatyn saýda núktesin, tólem termınaldaryn, uıaly telefondardy jóndeý jáne bólshekterin satý núktesin tonap ketken.Sottalýshylar ózderiniń qylmystyq is áreketterimen asa iri mólsherde jábirlenýshiler R., A., B., P., jáne K-ge ortaq jalpy 17 237 108 teńge materıaldyq shyǵyn keltirgen.
Sot úkimimen D. men J. Qazaqstan Respýblıkasy Qylmystyq Kodeksiniń 188-babynyń 4 bóliginiń 3 tarmaǵymen kináli dep tanylyp, jeke menshigindegi qylmystyq jolmen tabylǵan múlikteri tárkilenip, árqaısysyna 5 jyl merzimge bas bostandyǵynan aıyrý jazasy taǵaıyndaldy.
Azamattyq talap ishinara qanaǵattandyryldy.
