Aqtaýdaǵy 6 shaǵyn aýdanda elektr qýatynyń óship qalý sebebi belgili boldy
AQTAÝ. QazAqparat - Aqtaý qalalyq ákimdiginde jańa shaǵynaýdandarda joǵary kerneýli kabel jelileriniń isten shyǵýyna baılanysty brıfıng ótti, dep habarlaıdy QazAqparat ákimdiktiń baspasóz qyzmetine silteme jasap.
Brıfıngke Aqtaý qalalyq qurylys bólimi basshysynyń mindetin atqarýshy Mańǵystaý Qoıshyǵulov, «AEJB» MKK dırektory Aıtbaı Aıtmaǵanbetov, merdiger mekeme «Aıkom-LTD» JShS ókili Kóbenǵalı Tanashev, jobalaýshy mekeme «MýnaıGazproektServıs» JShS dırektory Baǵdat Bısenǵojıev qatysty.
Eske sala ketsek, 13 qańtar kúni tańǵy saǵat 6:00- da Shyǵys -1, 2, 31A, 31B, 32A, 32B shaǵynaýdandardaǵy joǵary kerneýli kabel jelileriniń isten shyǵý saldarynan elektr qýatynsyz qaldy. Qala ákiminiń tapsyrmasymen «AEJB» MKK mamandary aqaýdy anyqtap, elektr jelilerin qalpyna keltirdi.
Qalalyq qurylys bólimi basshysynyń mindetin atqarýshy Mańǵystaý Qoıshyǵulovtyń aıtýynsha, elektr taratý kabelderin júrgizý 2014 jyly bastalyp, 2015 jyly aıaqtalǵan. Ol Mamandandyrylǵan halyqqa qyzmet kórsetý ortalyǵy janyndaǵy GPP -4 qosalqy stansasynan bastalyp, jańa shaǵynaýdandarǵa deıingi aralyqty qamtıdy.
Joba boıynsha onda qımasy 3h240mm2 ASB markaly kabel tóselý kerek bolǵan. Alaıda, sol ýaqytta komıssııa qurylyp, tapsyrys berýshi qalalyq qurylys bólimi, jobalaýshy mekeme «MýnaıGazproektServıs» JShS, tehnıkalyq qadaǵalaý mekemesi, «AEJB» MKK, merdiger «Aıkom-LTD» JShS tehnıkalyq sheshim qabyldap, «Sshıtogopolıtelena» kabeline aýystyrylǵan.
«Bul kabeldiń oqshaýlaǵyshy jańǵysh zattarǵa tótep bere almaıdy. ıAǵnı, APvP kabelin tóseý kezinde 10 kV kabeldi jelilerin tóseý tehnologııasy atalǵan jobada bizdiń sharttarǵa sáıkes kelmeıdi»,- dedi Aıtbaı Aıtmaǵanbetov.
Al, brıfıngke qatysqan «Aıkom-LTD» JShS ókili joǵary kerneýli kabelderdiń isten shyǵýyn qurylystaǵy aýyr tehnıkalardyń jumysymen baılanystyryp otyr. Degenmen, «AEJB» MKK dırektorynyń málimetinshe, qoldanysqa engizilgen elektr taratý jelileri órtený saldarynan isten shyqqan. Aýystyrylǵan kabel byltyrda órtengeni aıtyldy.
