Aqtaýdaǵy zerthanaǵa zańsyz sertıfıkattar bergeni úshin 2,3 mln teńge aıyppul salyndy

ASTANA. KAZINFORM – Mańǵystaý oblysy Aqtaý qalasynyń ákimshilik quqyq buzýshylyqtar jónindegi mamandandyrylǵan soty «Ulttyq saraptaý jáne sertıfıkattaý ortalyǵy» AQ Mańǵystaý fılıalyna 2 359 200 teńge kóleminde aıyppul saldy.

Onymen qosa, «Fızıka-Hımııalyq-09» ólsheý boıynsha akkredıtteý attestaty 6 aı merzimge toqtatyldy.

Jospardan tys tekserýdiń nátıjesinde salystyryp tekserý zerthanasy akkredıtteý aımaǵynan tys kúkirt dıoksıdin (SO2) ólsheý sertıfıkattaryn bergeni anyqtaldy.

— Bul jaǵdaı anyqtalǵan zań buzýdy joıý jáne bolashaqta olardyń qaıtalanýyn boldyrmaý úshin qajetti sharalar qabyldaýdy talap etedi, — dedi SIM Komıteti tóraǵasynyń orynbasary Baýyrjan Qasymov.

Qolanystaǵy zańnamaǵa sáıkes, zerthana el zańnamasyn jáne olarǵa ózderiniń sáıkestigi akkredıttelgen normatıvtik qujattardyń talaptaryn saqtaýǵa mindetti. Sonymen qatar, zerthana akkredıtteý salasy sheginde jumystardy júzege asyrýǵa mindetti.

Atalǵan fakti boıynsha Tehnıkalyq retteý jáne metrologııa komıtetiniń Mańǵystaý oblysy boıynsha departamenti ákimshilik quqyq buzý týraly is qozǵap, anyqtalǵan buzýshylyqtardy joıý týraly nusqama berdi.

Búgingi tańda aıyppuldyń úshten bir bóligi tólendi, materıaldar attestattyń qoldanylýyn toqtata turý jóninde sharalar qabyldaý úshin akkredıtteý jónindegi ulttyq organǵa jiberildi, zańsyz berilgen sertıfıkattardyń kúshi joıyldy.

Aıta ketelik Aqtaý ákimdigi ınjenerlik jelilerdiń ústine kóp qabatty turǵyn úı salýǵa ruqsat berip jibergeni týraly jazǵan edik.