Aqtaýdaǵy ushaq apatynan keıin Kólik oqıǵalaryn tergeý jónindegi arnaıy ortalyq qurylady
ASTANA. KAZINFORM — Qazaqstanda jyl sońyna deıin Kólik oqıǵalaryn tergeý jónindegi arnaıy ortalyq qurylady. Bul týraly búgingi Úkimet otyrysynda aıtyldy.
Kólik vıtse-mınıstri Talǵat Lastaevtyń aıtýynsha, Aqtaý mańyndaǵy áýe apatynan keıin avıatsııalyq ákimshilik áýe kásiporyndaryn tekserýdi bastady.
— Avıatsııalyq oqıǵalardy tergeý máselesine keletin bolsaq, bul kórsetkish Qazaqstanda 51%-dy quraıdy. IKAO qaýipsizdik baǵalaýy úshin mańyzdy 8 krıtıkalyq kórsetkishtiń biri sanalatyn bul parametr eń tómengi deńgeıde qalyp otyr. Osyǵan baılanysty ahýaldy jaqsartý maqsatynda, jyl sońyna deıin joǵary bilikti mamandardy tartyp, qajetti jabdyqtarmen qamtamasyz etilgen Kólik oqıǵalaryn tergeý jónindegi arnaıy ortalyq qurý josparlanýda, — dedi T. Lastaev Úkimettiń búgingi otyrysynda.
Sonymen birge, Halyqaralyq avıatsııalyq uıymynyń baǵalaýynsha, Qazaqstandaǵy ushý qaýipsizdigi 82%-dy quraıdy. Bul kórsetkish Batys Eýropa elderiniń kórsetkishterimen qatar qoıýǵa keledi jáne álemdik ortasha deńgeıden (70,8%) 11,2%-ǵa joǵary.
Aıta keteıik, 25 jeltoqsanda Aqtaý mańynda Bakýden Groznyıǵa baǵyt alǵan AZAL jolaýshylar ushaǵy apatqa ushyraǵan bolatyn.
Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qalǵan edi.
Premer-mınıstrdiń orynbasary Qanat Bozymbaev ınternette taraǵan nusqa men «qara jáshiktegi» málimet arasynda úlken aıyrmashylyq bar ekenin aıtqan edi. Sondaı-aq ushaq apatyna baılanysty Reseıde, Qazaqstanda jáne Ázerbaıjanda qylmystyq is qozǵalǵan edi.
Buǵan deıin Brazılııa Áskerı-áýe kúshteriniń Áýe apattaryn zertteý ortalyǵynyń (Cenipa) mamandary AZAL áýe kompanııasynyń apatqa ushyraǵan Embraer 190 ushaǵynyń qara jáshigin taldaýǵa kiriskenin habarlaǵan bolatyn.
Qazaqstan Respýblıkasy Kólik vıtse-mınıstri Talǵat Lastaev QazAqparat tilshisine áýe apatyn tergeýdiń aldyn ala qorytyndysy qashan belgili bolatynyn aıtty.
30 jeltoqsanda Halyqaralyq áýe kóligi qaýymdastyǵy (IATA) oqıǵany jan-jaqty jáne beıtarap tergeýge shaqyrdy.