Aqtaýdaǵy ushaq apatynan qaza tapqan qazaqstandyqtardyń otbasylaryna taǵy kómek kórsetiledi

ASTANA. KAZINFORM – Premer-mınıstrdiń orynbasary Qanat Bozymbaev Aqtaý túbindegi ushaq apatynan qaıtys bolǵan qazaqstandyqtardyń otbasyna demeýshiler taǵy áleýmettik kómek kórsetetinin aıtty.

— Birinshiden áleýmettik kómek kórsetildi. Árbir otbasyǵa tıisti somasy tólendi. Jerleý rásimi, basqa da máseleler boıynsha bizdiń áriptesterimiz, ákimder ózderine júktelgen mindetterdi atqardy. Demeýshilerdiń arqasynda kelesi aptada taǵy bir kómek kórsetemiz dep oılaımyn. Ol otbasylarǵa tıisti kómek kórsetiledi. Ázirge naqty qandaı, qansha mólsherdegi kómek ekenin aıta almaımyn. Naqty belgili bolǵanda resmı málimetin beremiz, - dedi Qanat Bozymbaev.

Sondaı-aq ol qaza tapqandardyń otbasyna otbasyna 5 mln teńgeden áleýmettik kómek tólengenin aıtty.
Eske salsaq, 2024 jyldyń aıaǵynda Aqtaý túbindegi ushaq apatynan alty otandasymyz mert bolǵan edi.  

Qaza tapqan 6 Qazaqstan azamatynyń tórteýi Mańǵystaý oblysynyń turǵyny. Odan bólek, bir azamat Qostanaı oblysynan jáne bireýi Astana qalasynyń turǵyny.