Aqtaýdaǵy ushaq apatyna qatysty qazir ne belgili

ASTANA. KAZINFORM – Tańerteń Aqtaý qalasynyń mańynda Ázerbaıjan astanasy Bakýden Groznyıǵa baǵyt alǵan ushaq apatqa ushyrady.

Ushaq bortynda 69 adam bolǵan. Olardyń arasynda qazaqstandyqtar da bar. Qazir adamdardy qutqarý-izdestirý jumystary jalǵasyp jatyr.

Elimizdiń Tótenshe jaǵdaılar mınıstrligi usynǵan sońǵy málimetke sáıkes, apattan aman qalǵan 29 zardap shekken jan aýrýhanaǵa jetkizildi, onyń ishinde 2 bala bar.

Qaıǵyly jaıttan keıin Ázerbaıjanda 26 jeltoqsan Aza tutý kúni bolyp jarııalandy. 

Aıta keteıik, Memleket basshysy Qasym-Jomart Toqaev ushaq apatynan zardap shekken azamattarǵa kómek kórsetýdi erekshe baqylaýda ustaýdy tapsyrdy. 

Prezıdent tapsyrmasyna sáıkes Úkimet komıssııasy Aqtaýdaǵy ushaq apaty ornynda jumysyn bastady. 

Odan bólek, Ázerbaıjan prezıdenti Ilham Álıevtiń tapsyrmasy boıynsha oqıǵanyń mán-jaıyn tergeý úshin memlekettik organdardyń ókilderi Qazaqstanǵa attandy. Olardyń qatarynda Tsıfrlyq damý jáne Kólik mınıstri, Tótenshe jaǵdaılar mınıstri, Bas Prokýrordyń orynbasary, Densaýlyq saqtaý mınıstriniń orynbasary, Memlekettik azamattyq avıatsııa agenttigi dırektorynyń orynbasary, AZAL vıtse-prezıdenti men basqa da tıisti memlekettik organdardyń ókilderi bar.

Sonymen qatar áýe apaty bolǵan oqıǵa ornynan vıdeo jarııalandy. 

Qaıǵyly oqıǵaǵa beı-jaı qaramaǵan elordalyqtar ushaq apatynan zardap shekken jandarǵa kómek retinde jappaı qan tapsyryp jatyr. 

Sondaı-aq astanalyqtar Qazaqstandaǵy Ázerbaıjan elshiliginiń aldyna gúl shoǵyn qoıyp, qaıǵyǵa ortaqtasýda.

Óz kezeginde ázerbaıjandyq BAQ ókilderi qazaqstandyqtarǵa alǵys aıtyp jatyr. 

Senat spıkeri Máýlen Áshimbaev Aqtaýdaǵy ushaq apatynan qaza tapqandardyń jaqyndaryna kóńil aıtty.