Aqtaýdaǵy ushaq apaty: tórt adamnyń denesi tabyldy

ASTANA. KAZINFORM – Mańǵystaý oblysynyń Densaýlyq saqtaý basqarmasy Aqtaý mańyndaǵy ushaq apatynan zardap shekkenderge qatysty sońǵy málimetpen bólisti.

Aqparatta aıtylǵandaı, oqıǵa ornynda qaza tapqan 4 adamnyń denesi tabyldy.

Basqarma basshysy B. Іzbasarov habarlaǵandaı, 25.12.2024. saǵat 10:58-de shuǵyldyqtyń 1-sanatyna shaqyrý kelip tústi (ushaqtyń bortynda balon jaryldy). Oqıǵa ornyna 22 jedel járdem jáne 6 apattar medıtsınasy ortalyǵynyń brıgadasy jiberildi.

Oblystyq kóp beıindi aýrýhana 30 hırýrgııalyq jáne travmatologııalyq jáne 10 reanımatsııalyq tósek-jaı daıyndady. Sonymen qatar oblystyq balalar aýrýhanasy 20 tósek-jaı jáne 10 reanımatsııalyq tósek daıyndaldy.

Odan bólek, qosymsha jeke klınıkalardan, atap aıtqanda «Sofımed» JShS hırýrgııalyq jáne travmatologııalyq 10 jáne 2 reanımatsııalyq tósek, «Neıron» JShS hırýrgııalyq jáne travmatologııalyq 10 tósek jáne 4 reanımatsııalyq tósek, «ıAsın-Atameken» JShS somatıkalyq beıindegi 10 tósek daıyndady. Barlyǵy 60 hırýrgııalyq, travmatologııalyq jáne somatıkalyq beıindegi tósek jáne 26 reanımatsııalyq tósek bar.

Qazir aýrýhanaǵa 26 zardap shegýshi jetkizildi, patsıentterdi qabyldaý boıynsha suryptaý júrgizilip jatyr. Jetkizilgen 24 adamnyń ishinde 7 adam aýyr jaǵdaıda reanımatsııaǵa jatqyzylady. Balalar aýrýhanasyna 11 jáne 16 jastaǵy 2 bala kelip tústi.

Aıta keteıik, Aqtaýda Azerbaijan Airlines ushaǵy apatqa ushyrady.

Oqıǵa ornyna QR Tótenshe jaǵdaılar mınıstrligi jeke quramynyń 52 adamy men 11 birlik tehnıkasy bardy.

Apatqa ushyraǵan ushaq bortynda Qazaqstannyń 6 azamaty boldy.

QR Kólik mınıstrligi málim etkendeı, Ázerbaıjan tarapynyń aldyn ala aqparaty boıynsha, bortta 62 jolaýshy men 5 ekıpaj múshesi bolǵan.